Müxtəlif satınalma metodlarının tətbiqi üzrə təlim kursu keçirilib

Antiinhisar Siyasəti və İstehlakçıların Hüquqlarının Müdafiəsi Dövlət Xidməti ötən həftə dövlət satınalmalarına cəlb olunan mütəxəssislər üçün təlim kursu keçirib.

İqtisadiyyat Nazirliyinin məlumatına görə, təlimin mövzusu “Dövlət satınalmaları: metodlar və onların tətbiqi şərtləri” olub.

Rabitə və Yüksək Texnologiyalar Nazirliyinin, eləcə də 3 dövlət komitəsinin (Dövlət Statistika Komitəsi, Dövlət Gömrük Komitəsi və Əmlak Məsələləri Dövlət Komitəsi) nümayəndələri müxtəlif satınalma metodlarının (açıq və qapalı, kotirovka sorğusu, təkliflərin sorğusu, birbaşa müqavilə) şərtləri barədə danışıblar.

Hesablama Palatasının illik hesabatlarında bildirilir ki, bir sıra hallarda satınalma təşkilatları düzgün olmayan satınalma metodları tətbiq edirlər. Halbuki «Dövlət satınalmaları haqqında» qanun 2001-ci ildən qüvvədədir. İndiyədək bu fakta görə heç kim cəzalandırılmayıb.

Bu ilin yanvarında Satınalmalar üzrə Dövlət Agentliyi ləğv olunub və onun səlahiyyət və funksiyaları İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə verilib. 2015-ci ildə Azərbaycanda 8000 satınalma müsabiqəsi keçirilib. 08D