Natiq Cəfərli: «Gömrük tarifləri artırılandan sonra qiymətlər ciddi şəkildə bahalanacaq»

Məsələ açıq qalır, hökumət hesablayıbmı ki, daxili istehsalımız nə qədərdir?, deyə iqtisadçı Natiq Cəfərli «Facebook» səhifəsində yazıb.

Turan-ın məlumatına görə, Natiq Cəfərli əmindir ki, gömrük tarifləri artırılandan sonra qiymətlər ciddi şəkildə bahalanacaq.

Qeyd edək ki, hökumətin qərarı ilə Azərbaycanda bir sıra idxal mallarına gömrük rüsumu artırılıb. Məsələn, toyuq  və qoyuq məhsulları üçün gömrük rüsumu 1 kq üçün  1$, ərzaq yumurtasının  1000 ədədi üçün $100, 1kq soğan və xiyar üçün 0,2 dollar, 1kq qoz üçün 1,5 dollar, 1kq üzüm üçün 0,4 dollar, 1kq alma üçün 0,3 dollar (sidr istehsalı üçün 16 sentyabr - 15 dekabr), armud (armud şərabı istehsalı üçün 1 avqust - 31 dekabr), heyva və xurma, mineral və qazlı su və şirələrin 1 litri üçün 0,7 dollar müəyyən edilib.

İndiyədək bu mallar üzrə gömrük rüsumu malın qiymətinin 15 faizi qədər idi.

«Guya daxili istehsalı, istehsalçını qorumaq üçün bu addımı atırlar, ilk baxışdan, hətta, doğru da görünə bilər. Bu həcm daxili tələbatımızı ödəyəcəkmi? Rüsumların artırılması daxili bazarda qiymətlərə necə təsir edəcək?», deyə N.Cəfərli qeyd edir. 

O bildirib ki, daxili istehsalçının xaricdən gələn məhsulun qiymətində artım olacaqsa, öz qiymətlərini də ona uyğun artırmayacağına zəmanət yoxdur.

«İndiki çətin iqtisadi və sosial durumda bazarda bolluq yaradıb qiymətləri aşağı çəkməkmi məntiqlidir, yoxsa 3-5 daxili istehsalçının maraqlarını qorumaqmı? Sirr deyil ki, daxili istehsal da əsasən iri çaplı məmurlara məxsusdur. İstehlakçı nəyə görə seçim imkanlarından məhrum olmalı, daxili məhsulu seçməyə məcbur olmalıdır?», deyə o bildirib. 

Qeyd edək ki, sənəd rəsmi mətbuatda oktyabrın 2-də dərc edilib. O, dərc ediləndən 30 gün sonra – noyabrın 1-də qüvvəyə minir. 71В