Naxçıvan MR Dövlət Şəhərsalma və Arxitektura Komitəsinə təsərrüfat funksiyaları həvalə edilib

Naxçıvan Muxtar Respublikasında bazar iqtisadiyyatı prinsipləri və dövlət idarəetmə sistemi baxımından çətin izah olunan proseslər baş verir. Fevralın 6-da muxtar respublikanın Ali Məclisinin sədri Vasif Talıbovun imzaladığı fərmana görə, hökumət strukturuna təsərrüfat  funksiyası həvalə edilib.  

Fərmana əsasən  Naxçıvan Dövlət Tikinti-Quraşdırma Şirkəti ləğv olunub və  onun əmlakı, şəhər (rayon) idarələri özünümaliyyələşdirmə prinsipləri əsasında Naxçıvan MR Dövlət Şəhərsalma və Arxitektura Komitəsinə verilib. Tikinti sahəsində idarəetmənin təkmilləşdirilməsi məqsədilə atılan bu addım ona gətirib çıxarıb ki, DŞAK mərkəzi aparatının əməkdaşlarının ştatı təxminən üç dəfə - 30 nəfərdən 89 nəfərədək artıb.

Naxçıvan Dövlət Tikinti-Quraşdırma Şirkəti muxtar respublikada mülki tikinti üzrə dövlət sifarişli layihələrin əsas podratçısı kimi çıxış edirdi. Şirkətin maddi-texniki bazası vaxtaşırı yenilənirdi. 2012-ci ildə muxtar respublikanın büdcəsinin hesabına bir neçə tikinti texnikası alınıb. Muxtar respublikada dövlət büdcəsinin hesabına əsaslı tikinti hər il yüz milyon manatlarla təşkil edir. 

Qeyd edək ki, mərkəzi İcra Hakimiyyətinin şəhərsalma üzrə analoji strukturu bir neçə il öncə təmir-tikinti idarələrindən ayrılıb. Belə ki, bu idarələr özəlləşdirilib.  08B