Niderland Krallığı ilə iqtisadi əlaqələr genişlənir

Bu gün Niderland Krallığı baş nazirinin müavini, iqtisadi məsələlər, kənd təsərrüfatı və innovasiyalar naziri Maksim Verhagenin səfəri çərçivəsində investisiyaların qarşılıqlı qorunması və təşviqi layihəsi üzrə bəyannamə imzalanıb. 

Bundan başqa, Azərbaycan Aqrar Universiteti ilə "Friesian" süd məhsulları istehsalı konsaltinq şirkəti arasında  "Biznesin idarə eilməsi və eksperimental fermaların inkişafı sahəsində magistr kursu " üzrə qarşılıqlı anlaşma sazişi imzalanıb. Azərbaycan Diplomatiya Akademiyası və Maastrix İdarəetmə Mərkəzi biznesin idarə edilməsi üzrə memorandum və «Bakı – Ağ şəhər» layihəsi çərçivəsində 10 min kv m ofisin tikintisi texniki layihəsi haqqında müqavilə imzalanıb. 

İİN mətbuat xidmətində Turan-a deyiblər ki, bu ölkə Azərbaycanın vacib iqtisadi tərəfdaşıdır. 70 holland şirkəti Azərbaycana $365 mln investisiya qoyub. Niderlanddan Azərbaycana ixrac 2011-ci ildə 3 dəfə artıb. Yanvardan avqusta iki ölkə arasında əmtəə dövriyyəsi 42% artıb. İki ölkə arasında iqtisadi sahədə 10 saziş imzalanıb. Forumun işində logistika, sənaye, İKT, kənd təsərrüfatı, tikinti, energetika, arxitektura və s. sahələrin təmsilçiləri iştirak edib. 

Dövlət Gömrük Komitəsinin məlumatına görə, 2012-ci ilin I yarısında Niderlanddan Azərbaycana idxal $70,4 mln (+32,6%), ixrac $3,8 mln (+22,5%) olub. 

Həm də offşor zonası kimi məşhur olan Niderland Azərbaycana birbaşa investisiyalarda lider mövqelərdədir. Azərbaycanda Hollandiya kapitallı çoxlu şirkət işləyir. --17D—