Özəlləşmədən mədaxil sabitləşib

2013-cü ildə dövlət əmlakının özəlləşməsindən dövlət büdcəsinə mədaxil  35 mln manat olub. Praktika göstərir ki, özəlləşdirilən əmlakın qiyməti bazar qiymətinə uyğun gəlmir, formal xarakter daşıyır. 

Əmlak Komitəsi 2013-cü ildə özəlləşmənin gedişi barədə məlumatları açıqlayıb. İllik hesabatda səhmlərin güzəştli satışından mədaxil və əmək kollektivlərinin üzvlərinin payından mədaxil əksini tapıb ki, bu da 278 428 manat təşkil edib. 2013-cü ilin mayında “Baku Steel Company” 240 günə dövlət büdcəsinə 14 mln manat köçürmək öhdəliyi götürüb.  

Ötən il kiçik özəlləşmə çərçivəsində 700 müəssisə və obyekt (o cümlədən avtonəqliyyat vasitəsi), 720 obyektin torpaq sahəsi satılıb. Bundan başqa, ixtisaslaşdırılmış hərraclarda (30% və çox) 41 SC-nin, ixtisaslaşdırılmış pul hərraclarında 5 SC-nin, investisiya müsabiqələrində 3 SC-nin səhmləri satılıb. Maraqlıdır ki, ƏMDK 2 SC üzrə (“Beyləqan-Pambıq” və “Azərboru”) investisiya müsabiqələrinin nəticələrini açıqlayıb. Belə çıxır, üçüncü uğurlu müsabiqənin nəticələri açıqlanmayıb. 

Maliyyə Nazirliyinin məlumatına görə, 2012-ci ildə dövlət əmlakının özəlləşməsindən dövlət büdcəsinə mədaxil 35,1 mln manat olub. Bu il və gələn il bu göstərici 30 mln manat proqnozlaşdırılıb. 08D