PASHA Bank $30250000 həcmində kredit cəlb etdi

Azərbaycanın aparıcı korporativ banklarından biri olan PASHA Bank Baltikums Bank AS, Commerzbank Aktiengesellschaft, FBME Bank Ltd və Raiffeisen Bank International AG kimi beynəlxalq maliyyə institutlarından ümumi həcmi $30250000 təşkil edən kredit cəlb etmişdir. Raiffeisen Bank International AG eyni zamanda kredit agenti qismində çıxış edir. Azərbaycan bazarı üçün unikal şərtlər altında bir il müddətinə verilmiş bu kredit ticarətin və  ümumi investisiya layihələrinin  maliyyələşdirilməsi üçün istifadə olunacaq.

Bankın İdarə Heyətinin Sədri Fərid Axundov, bildirmişdi: “PASHA Bank Avropa bazarlarında hökm sürən qeyri-müəyyənliyə baxmayaraq, əməkdaşlıq etdiyi aparıcı banklardan güclü dəstək almaqdadır. Bu inam, PASHA Bankın qısa tarixinə baxmayaraq özünün biznes strategiyasının uğurlu icrası çərçivəsində nümayiş etdiyi yüksək maliyyə və davamlı inkişaf göstəricilərinin nəticəsidir”.

PASHA Bank – Azərbaycanın aparıcı korporativ bankıdır. 2007-ci ildə təsis olunmuş Bank, geniş spektrli korporativ bank xidmətlərini göstərir, eləcə də: kreditlərin verilməsi, qiymətli kağızlar bazarında əməliyyatlar, aktivlərin idarə olunması və xəzinədarlıq xidmətləri. Baş ofis və dörd filial ilə təmsil olunan PASHA Bankda 207 əməkdaş çalışır. “Europe Banking Awards 2011” çərçivəsində Bank “Azərbaycanın ən yaxşı İnvestisiya Bankı” elan olunmuşdur.

PASHA Bank Azərbaycanın iri investisiya Xoldinqi olan və sığorta, inşaat, inşaat materiallarının istehsalı, turizm və eləcə də biznesin sair istiqamətlərində də geniş təmsil olunan PASHA şirkətlər qrupunun bir hissəsidir. Azərbaycanın pərakəndə bankçılıq bazarının iri banklarından biri olan Kapital Bank da PASHA şirkətlər qrupuna aiddir.--15D--