Pirsaatda yanan neft kimin olub?

Məlumat verildiyi kimi, yanvarın 12-də Hacıqabul rayonundakı Pirsaat stansiyasında neftlə dolu 7 vaqon-sistern relsdən çıxıb. Onların üçü aşıb, dağılan neft alışıb, 180 ton neft yanıb.

Bu neft kimindir, yükü göndərən kimdir? Dəmir Yolu İdarəsinin məlumatına görə, neft Səngəçalda yüklənib, 60 tonluq 40 vaqon-sistern Batumiyə gedirmiş. 

Səngəçal sahil terminalı (ВР şirkətinin eyniadlı terminalı ilə qarışdırmamalı - red.) əvvəllər Azpetrol şirkətinə məxsus olub. 2005-ci ilin sonundan onu CrossCaspian birgə şirkəti idarə edir. O, Xəzərlə neft və neft məhsullarının nəqli ilə, həmçinin Cənubi Qafqaz nəqliyyat dəhlizi üzrə logistika məsələləri ilə  məşğuldur. 

Hazırda Səngəçal terminalına xam neft Azərbaycan, Qazaxıstan və Türlmənistandan daxil olur. Türkmən nefti sonradan Bakı-Tbilisi-Ceyhan (BTC) ilə  nəql edilir. Qazaxıstan nefti Səngəçaldan dəmir yolu ilə Batumiyə daşınır.Azərbaycandan təkcə Amerikanın ExxonMobil şirkəti “Azəri-Çıraq-Günəşli” çərçivəsində əldə etdiyi nefti dəmir yolu ilə Batumiyə ixrac edir. Ona görə yanan neftin kimə məxsus olduğunu yalnız təxmin etmək olar. 

* ВТС layihəsi müzakirə edilən zaman ExxonMobil rəhbərliyi ВТС-ni kommersiya cəhətdən qeyri-rentabelli hesab etmişdi, ona görə BTC Co səhmdarları siyahısında yoxdur. ВТС istismara başlayandan sonra xammalın bu kəmərlə nəqli şərtləri ExxonMobil üçün sərt oldu və o, dəmir yolunu seçdi. --12В—