Qazaxıstan və Azərbaycan bitki mühafizəsi sahəsində əməkdaşlıq edəcək

Bakı/02.03.23/Turan: Qazaxıstan Senatının deputatları palatanın martın 2-də keçirilən plenar iclasında Qazaxıstan və Azərbaycan hökumətləri arasında karantin və bitkilərin mühafizəsi sahəsində əməkdaşlıq haqqında Sazişi ratifikasiya ediblər.

Zakon.kz-nin müxbiri xəbər verir ki, sənəd imzalanmaq üçün dövlət başçısına göndərilib.

Qanunun əsas məqsədi ölkəyə karantinə alınan məhsulların idxalı zamanı fitosanitar təhlükəsizliyin təmin edilməsi üzrə tədbirlərin və qarşılıqlı fəaliyyətin gücləndirilməsidir.

Senatın müvafiq komitəsinin qərarında deyilir ki, iki ölkə arasında karantin altında olan məhsulların böyük həcmdə daşınması ilə əlaqədar karantin obyektlərinin ərazisinə daxil olma riski var ki, onların yayılması iki ölkə ərazisində fitosanitar vəziyyətə imənfi təsir göstərir.

Ümumilikdə sənəd daşınan məhsullar üçün zəruri olan fitosanitar nəzarəti, birgə fəaliyyət və bitki karantini üzrə milli xidmətlərin qarşılıqlı fəaliyyətini təmin etməyə yönəlib və Qazaxıstanın ixrac potensialına müsbət təsir göstərir.

Qeyd olunur ki, Sazişin ratifikasiyası mənfi sosial-iqtisadi və hüquqi nəticələrə səbəb olmayacaq, respublika büdcəsindən əlavə vəsait ayrılmasını tələb etməyəcək.—0--