Qəbələdə dağ-xizək kompleksi tikiləcək

Prezident İlham Əliyev Qəbələ rayonuna səfəri zamanı “Tufan”  dağ-xizək kompleksində işlərin gedişi ilə tanış olub.  Bu yay-qış istirahət mərkəzi Qəbələnin 4 km.-də yerləşir. İnşası nəzərdə tutulan 10 enmə zolağının ümumi uzunluğu 18 min metr olacaq. Kompleks ərazisində xizəklə eniş zolaqlarının qar örtüyünün təmin edilməsi məqsədilə burada 223 süni qaryaratma qurğusu yerləşdiriləcək. İstirahət mərkəzi gün ərzində üç min nəfərə xidmət göstərmək imkanına malik olacaq.

Sonra dövlət başçısına rayon ərazisində inşası planlaşdırılan “Aquapark” istirahət və əyləncə mərkəzi haqqında məlumat verilib. Mərkəzin su-əyləncə bölməsinin ümumi sahəsi 5 min kvadratmetr olacaq. Su zonasının mərkəzində dalğalı hovuz yerləşəcək. Xüsusi avadanlığın köməyi ilə burada 1,2 metrə qədər hündürlükdə süni dalğaların yaradılması mümkündür.

İ.Əliyev rayonda inşası nəzərdə tutulan “Golf Resort” idman və istirahət mərkəzinin layihəsi ilə də tanış olub. Layihəyə əsasən Qəbələ rayonu ərazisindən keçən Dəmiraparan çayı ilə ətrafdakı dağ massivinin arasındakı 80 hektarlıq ərazidə qolf meydançasının, qolf klubun, otel binasının, villaların və müvafiq infrastruktur obyektlərinin inşası nəzərdə tutulur.—06D-