Qiymətli kağızların buraxılışı 2% azalıb

QKDK-ə istinadən Dövlət Statistika Komitəsindən Turana verilən məlumata görə, bu ilin doqquz ay ərzində Azərbaycanda qiymətli kağızların buraxılışı 2% azalıb. QKDK-nin təqdim etdiyi məlumatlara əsasən, üç rüb ərzində ümumi nominal qiyməti 3 mlrd 928,4 mln manat olan qiymətli kağızların emissiyası qeydiyyata alınıb. 2012-ci ilin müqayisə olunan dövrü ərzində bu göstərici 4 007 mln manat təşkil edib. 

Buraxılan qiymətli kağızların əsas hissəsi – 1,8 mlrd manatlıq, səhmlərin payına düşüb. Səhmlərin buraxılması 7,5% artıb. Fond Birjası vasitəsilə doqquz ay ərzində ümumi məbləği 324,8 mln manat olan səhmlər yerləşdirilib. Oktyabrın əvvəlinə dövriyyədə nominal dəyəri 123,4 mln manat olan səhmlər var idi. 

Hesabat dövrü ərzində Mərkəzi Bank buraxılan notların həcmini (1 170 mln manat) 14,9% aşağı salıb. Bakı Fond Birjasında doqquz ay ərzində hərrac nəticəsində ümumi dəyəri təxminən  235 mln manat olan notlar yerləşdirilib. 

Bu il Maliyyə Nazirliyi dövlət istiqrazlarının buraxılış həcmini 500 mln manatdan 600 mln manata qədər artırıb. Bu zaman birja hərraclarında hökumət 67,8 mln manat məbləğində istiqraz yerləşdirə bilib. 

Bu il korporativ istiqrazlar bazarında müəyyən azalma olub. QKDK 2013-cü ilin yanvar-sentyabr ayları ərzində ümumi nominal dəyəri 340,3 mln manat olan buraxılış qeydiyyata alıb, bu da 2012-ci ilin eyni dövrü ilə müqayisədə 97,9 mln manat yaxud 22,3% azdır. Bununla yanaşı oktyabrın əvvəlinə dövriyyədə Azərbaycan İpoteka Fondunun və müxtəlif şirkətlərin ümumi dəyəri 461,3 mln manat olan istiqrazları olub. 08D