Renault avtokonserni Azərbaycanda satışı artırıb

Renault avtokonserni 2012-ci ildə Azərbaycanda 259 avtomobil satıb. 2011-ci il ilə müqayisədə bu, yüksək göstəricidir. Məlumatı Renault avtokonserninin ölkədəki rəsmi dileri Nurgun Motors yayıb. 

Renaultun ən populyar modelləri  Logan, Duster və Fluence-dir.

«2012-ci ildə Azərbaycanda Renault avtomobillərinin satışı sabit şəkildə artıb və bu, komandamızın uğurudur» deyə Nurgun Motors-un marketinq departamentinin rəhbəri Vasif Əliyev bildirib. Ötən ilin martında Bakıda Renault markasının rəsmi satış mərkəzi açılıb. Onun sayəsində müştərilər modellərlə tanış olmaq, kredit və maliyyə təklifini öyrənmək, keyfiyyətli servis xidmətindən istifadə etmək imkanı qazanıb. Əliyev əmindir ki, 2013-cü ildə Renault həvəskarları artacaq. 

2012-ci ilin nəticələrini şərh edən Renaultun Avrasiya üzrə baş direktorunun müavini Deni Levot qeyd edib: «Bu il Renault qrupu MDB və Gürcüstanda satış bazarlarında rekord vurub və regionda möhkəmlənib. Bu, bir daha göstərir ki, bizim istehlakçılara məqbul qiymətə keyfiyyətli məhsul təklif etmək strategiyamız səmərəli işləyir».

2012-ci ildə Avrasiyada (Ermənsitan, Azərbaycan, Belarus, Gürcüstan, Qazaxıstan və Ukrayna) Renault 17 898 avtomobil satıb. Bu, 2011-ci ildəkindən 12% çoxdur. 

Bu il Azərbaycana Renaultun yeni modelləri gətiriləcək. Logan, Sandero, Fluence və Megane modellərinin satışı planlaşdırılır. 

Azərbaycanda xarici markaların distribütor və dilerlərinin çoxu real satış həcmini gizləməyə üstünlük verir. Renault bu cəhətdən yaxşı istisnadır. 08D