Sabah BIHE 2013 səhiyyə sərgisi başlayır

“BIHE 2013” 19-cu Azərbaycan Beynəlxalq “Səhiyyə” sərgisi 31 oktyabrda “Bakı Ekspo” mərkəzində keçiriləcək. Bu gün sərginin açılışına həsr olunmuş mətbuat konfransı keçirilib və qeyd edilib ki, sərgi bütün parametrlər üzrə artıb.

“ITE Group Plc” şirkətinin icraçı direktoru cənab Edvard Stroon bildirib ki, BIHE dövlət təşkilatları, tib avadanlığı istehsalçıları, həkimlər, tibb sənayesi mütəxəssislərinin vacib görüş yerinə çevrilib. 

Azərbaycan Respublikası Səhiyyə Nazirliyi Mətbuat şöbəsinin müdiri Anar Qədirli qeyd edib ki, sərgilər dövlət və özəl səhiyyənin inkişafında mühüm rol oynayır. Onların köməyi ilə yerli şirkətlər yeni avadanlıq, tibb vasitələri və  ləvazimat təklif edən tərəfdaşlar tapır. 

2014-cü ildə hökumət dərman, sarğı materialı və tibb texnikası alınmasına 177 mln manat yönəldəcək. Bu, 2013-cü ildəkindən 9,9%, 2012-ci ildəkindən 20,3% çoxdur.      

“BIHE” layihəsinin meneceri Elmira Ağayeva qeyd edib ki, sərgiyə 17 ölkədən 130 iştirakçı qatılacaq. Debütantlar arasında Qazaxıstan, BƏƏ və İordaniya şirkətləri var. İlk dəfə Çexiya Sənaye və Ticarət Nazirliyinin təşəbbüsü ilə bu ölkənin milli sərgisi nümayiş etdiriləcək. 9 çex şirkəti ortopediya məhsulları, laboratoriya avadanlığı, təcili yardım avadanlığı, klinika mebeli nümayiş etdirəcək. BIHE eksponatlarının 60%-i xarici şirkətlərə məxsusdur. BIHE 2013 sərgisində ilk dəfə 15 klinikanı əhatə edən tibb turizmi təşkil olunub. 

Paralel olaraq 8-ci Azərbaycan «Stomatologiya» və 7-ci Azərbaycan «Gözəllik və Estetik Tibb» səgiləri keçiriləcək. 08C