AİHM 2010-cu il parlament seçkiləri ilə bağlı 11 şikayət üzrə kommunikasiyaya başlayıb

Avropa İnsan Hüquqları Məhkəməsi (AİHM) 2010-cu il parlament seçkilərində namizədlərin hüquqlarının pozulması haqqında daha 11 şikayət üzrə Azərbaycan hökuməti ilə kommunikasiyalara başlayıb.

Bu, Tofiq Yaqublunun (AXCP-Müsavat Siyasi Partiyalar Bloku), Sərdar Məmmədovun (Qarabağ Seçki Bloku), Bəxtiyar Hacıyevin (müstəqil namizəd), İlqar Hüseyninin (müstəqil namizəd), Nəriman Yəhyayevin (AXCP-Müsavat Siyasi Partiyalar Bloku), Gözəl Bayramovanın (AXCP-Müsavat Siyasi Partiyalar Bloku), Namət Əliyevin (AXCP-Müsavat Siyasi Partiyalar Bloku), Salman İmanlının (Qarabağ Seçki Bloku), Sahib Kərimovun (AXCP-Müsavat Siyasi Partiyalar Bloku), Arzu Səmədbəylinin (AXCP-Müsavat Siyasi Partiyalar Bloku), Həsən Kərimovun şikayətləri ilə bağlı işlərdir. 

Hüquqi Maarifləndirmə Cəmiyyətinin rəhbəri İntiqam Əliyevin Turan-a verdiyi məlumata görə, ərizəçilər seçkilər zamanı saxtalaşdırmalardan, o cümlədən hakimiyyətin qanunsuz müdaxiləsindən, inzibati resurslardan hakim partiyanın xeyrinə istifadədən, ayrı-seçkilikdən və s. şikayət edirlər.

AİHM hökumət qarşısında qoyduğu sualları cavablandırmaq üçün 2014-cü ilin fevralın 7-nə qədər vaxt verib. Əliyevin sözlərinə görə, 2010-cu il parlament seçkilərindən şikayətlərin sayı 43-ə çatıb.

Kommunikasiya olunan şikayətlərin 31-i namizədliyin qeydiyyatından imtina, 12-i isə digər seçki prosesində baş verən pozuntular və onlarla bağlı səmərəli araşdırmaların olmaması ilə bağlıdır. Ümumilikdə isə, 2010-cu il seçkiləri ilə bağlı AİHM-yə 100-dən çox şikayət verilib.

Bundan əvvəl AİHM 2005-ci il parlament seçkiləri zamanı pozuntular haqqında 40 şikayətdən 11-nə mahiyyəti üzrə baxıb və ərizəçilərin hüquqlarının pozulduğunu tanıyıb. Daha 7 namizədin ərizələri hökumətin barışıq sazişi barədə təklifi müsbət cavablandırıldığı üçün baxılan işlərin siyahısından çıxarılıb. Həsən Kərimovun (AXCP) ərizəsi üzrə yaxın günlərdə qərar qəbul ediləcək.

“2005-ci ilin seçkilərində təmin olunan ərizələrin və 2010-cu ildə kommunikasiyası başlanan şikayətlərin sayı bu ölkədə azad və ədalətli seçkilərin keçirilmədiyi barədə həm ölkə, həm də beynəlxalq səviyyədə səsləndirilən həyəcan təbilinin əsassız olmadığını təsdiqləyən təkzibedilməz faktdır”, deyə İntiqam Əliyev qeyd edib. Onun sözlərinə görə, hökumət AİHM-nin 2005-ci il seçkiləri ilə bağlı qərarları üzrə öhdəliklərini icra etməyib.

Söhbət yalnız kompensasiyaların ödənilməsindən deyil, həm də arasında cinayət faktları da olan pozuntuların araşdırılması öhdəliklərindən gedir. Bu qərarlar üzrə hələ heç kim inzibati və cinayət məsuliyyətinə cəlb edilməyib. Seçki təcrübəsini və qanunvericiliyini təkmilləşdirmək yerinə, hakimiyyət əks istiqamətdə hərəkət edir, kampaniya şərtlərini sərtləşdirir, hüquqları daraldır, deyə Əliyev bildirib.

2013-cü il prezident seçkiləri də hakimiyyətin ədalətli seçkilər keçirmək niyyəti olmadığını göstərib.

Əliyev hesab edir ki, həmkəmə qərarlarının icra edilməməsi haqqında məsələləri AŞ Nazirlər Komitəsinə çıxarmaq lazımdır. Hakimiyyətin “kürü diplomatiyasına” baxmayaraq, yerli və beynəlxalq ictimaiyyətin təzyiqi altında Strasbuqrda rəsmi Bakının mövqeyi zəifləyib. -06D-