Samir Şərifov yanvar-iyun aylarında dövlət büdcəsinin icrası barədə

Birinci yarımildə Azərbaycanın dövlət büdcəsi kəsirlə icra edilib  (771 mln. manat və ya büdcə xərclərinin 9%-i). Bu barədə maliyyə naziri Samir Şərifov Nazirlər Kabinetinin ölkənin sosial-iqtisadi inkişafına həsr olunmuş iclasında bildirib.

Nazirin sözlərinə görə, dövlət büdcəsinin gəlir və xərcləri arasında fərq 2014-cü ildə dövlət büdcəsinin icrası zamanı əldə edilmiş profisit hesabına maliyyələşib.

Rəsmi statistikaya görə, dövlət büdcəsinin ümumi xərcləri yanvardan iyula kimi 7 mlrd. 807 mln. manat, xərclər 8 mlrd. 578 mln. manat təşkil edib.

Dövlət Neft Fondundan büdcəyə 3 milyard 562 milyon manat vəsait transfert daxil olub.

Dövlət Neft Fondundan dövlət büdcəsinə proqnozlaşdırılan transfert nəzərə alınmadan digər mənbələr üzrə dövlət büdcəsinin gəlirləri 4 milyard 246 milyon manat və yaxud proqnoza nisbətən 29,0 milyon manat (0,7 faiz) çox icra olunub.

Təsdiq olunmuş proqnoza Vergilər Nazirliyi 100,2 faiz yerinə yetirilməklə büdcəyə 3 milyard 329 milyon manat vəsait təmin edib. Həmin vəsaitin 68,3 faizi və ya 2 milyard 275 milyon manatı qeyri-neft sektorundan daxilolmaların payına düşür ki, bu da 2014-cü ilin müvafiq dövrünə nisbətən 11,4 faiz-bənd çoxdur.

Dövlət büdcəsinin xərclər strukturunda ənənəvi olaraq investisya layihələri liderlik edir - 3 mlrd. 102 mln. manat və ya 36,16%, sosial xərclər 2 mlrd. 25 mln. manat (23,6%) təşkil edib.

Nazirin sözlərinə görə, 2015-ci ilin yanvar-iyun aylarında Azərbaycan prezidenti regionlarda abadlaşırma işləri, aqrar-sənaye sektorunun dəstəklənməsi, kəndlər arasında avtomobil yollarının inşası və s. məqsədlər üzrə işlərin maliyyələşdirilməsinə dövlət büdcəsindən 74 mln. manatın ayrılması barədə sərəncamlar imzalayıb.

Xatırladaq ki, bu il üçün dövlət büdcəsinin gəlirləri 19 mlrd. 438 mln. manat, xərclər 21 mlrd. 100 mln. manat səviyyəsində təsdiqlənib. Kəsir 1 mlrd. 662 mln. manat və ya ÜDM-in 2,8%-i səviyyəsində proqnozlaşdırılır.--17D—