«Səba» ASC əməkdaşların bir hissəsinin ödənişsiz məzuniyyətə göndərildiyini təsdiq edib

“Səba” ASC şirkət əməkdaşlarının bir hissəsinin 3 ay müddətinə ödənişsiz məzuniyyətə göndərildiyi barədə oktyabrın 5-də yayılmış məlumatı Turan-a təsdiq edib.

Şirkətdən bildiriblər ki, quş əti istehsalı ilə məşğul olan müəssisənin 50 əməkdaşı üç ay müddətinə ödənişsiz məzuniyyətə göndərilib.

Şirkət bu tədbiri quş fabrikinin səmərəlili fəaliyyətinə nail olmaq istəyi ilə izah edib.

“Buna səbəb xammal və materialların qiymətinin qalxmasıdır. Şirkət inzibati xərclərin azaldılması qərarına gəlib. Quş əti istehsalı müəssisəsinin 500 manatdan yuxarı əməkhaqqı alan inzibati heyətinin maaşı isə mənfəətə bağlı sistemə keçirilib”, deyə məlumatda bildirilir.

“Səba” quşçuluq fabrikində 800 nəfərdən yuxarı işçi çalışır. Ötən 9 ayda müəssisənin rentabelliyinin düşməsinə baxmayaraq, 1 nəfər də işdən azad edilməyib.

Bununla belə, məlumatda vurğulanır ki, Nazirlər Kabinetinin ixrac-idxal əməliyyatları üzrə gömrük rüsumlarının dərəcələrinə dəyişikliklərlə bağlı 23 sentyabr 2016-cı il tarixli qərarı şirkətin satış həcminə yaxın vaxtlarda müsbət təsir göstərəcək. Bu da quş əti istehsalı müəssisəsinin yaxın aylarda rentabelliyə çıxmasına və “Səba”nın özhesabına məzuniyyətə göndərilmiş işçilərinin yenidən öz iş yerlərinə qayıtmasına səbəb olacaq, deyə “Səba” ASC-dən bildiriblər.

Qeyd edək ki, hələ sentyabrda Turan “Səba” ASC-də bu cür tədbirlərin hazırlandığını bildirmişdi. Amma həmin vaxt şirkət rəhbərliyi agentliyə bu məlumatın “təxribat xarakterli” olduğunu demişdi. -71D-