Səudiyyə İnkişaf Fondu Xırdalan şəhərinin su təchizatı və kanalizasiya sisteminin yenidən qurulması layihəsini maliyyələşdirəcək

Hökumət nümayəndə heyətinin ər-Riyada (Səudiyyə Ərəbistanı) səfəri çərçivəsində “Xırdalan şəhərinin su təchizatı və kanalizasiya sisteminin yenidən qurulması və genişləndirilməsi ” layihəsi üzrə kredit sazişi razlaşdırılıb. Bu barədə Turan-a “Azərsu” ASC-də məlumat veriblər. 

Kredit sazişinə əsasən, bu layihənin maliyyələşdirilməsi üçün Səudiyyə İnkişaf Fondu Azərbaycan hökumətinə güzəştli şərtlərlə  35 mln dollar kredit ayıracaq.  

İcrasına cari ilin ikinci yarısında başlanacaq layihəyə əsasən Abşeron rayonu Xırdalan şəhərinin su təchizatı və kanalizasiya sistemləri  yenidən qurulacaq.  Xırdalan şəhərinə içməli su Ceyranbatan Sutəmizləyici Qurğular Kompleksindən veriləcək. Bunun üçün hər birinin tutumu 20 min kubmetr olan 3 yeni  anbar tikiləcək. Xırdalan şəhərində ümumi uzunluğu 159 km olan su şəbəkəsi yaradılacaq. Şəhərin kanalizasiya şəbəkəsinin tikintisinə isə yeni kanalizasiya kollektoru istismara veriləndən sonra başlanacaq.  Gələcəkdə Xırdalan şəhərində toplanan çirkab suları hazırda Lökbatan qəsəbəsi yaxınlığında inşa edilən və sutkalıq məhsuldarlığı 200 min kubmetr olacaq çirkab sutəmizləyici qurğuya ötürüləcək. Çirkab suların bu qurğuya özüaxımlı rejimdə ötürülməsini təmin etmək üçün Xırdalan şəhərindən Xocasən qəsəbəsinədək 7 km uzunluğunda tunel tipli kollektor tikilməsinə başlanılıb. Hazırda Xırdalan şəhərində toplanan çirkab suları təmizlənmək üçün Hövsan Aerasiya Stansiyasına ötürülür. Tikinti işlərinin 2014-cü ilin sonunda başa çatacağı nəzərdə tutulur. Laayihənin icrası tam başa çatdıqdan sonra Xırdalan şəhərində 100 mindən çox sakinin içməli su və kanalizasiya xidmətlərindən istifadəsi yaxşılaşacaq.

Səudiyyə İnkişaf Fondu Azərbaycanda bir neçə su təchizatı layihəsini maliyyələşdirir. 08D