Şəxsi torpaqların satışına məhdudiyyət qoyulub

Azərbaycanda fərdi yaşayış evi tikintisi məqsədilə alınmış torpaq hissələrinin özgəninkiləşdirilməsinə məhdudiyyətlər nəzərdə tutan qanunvericilik aktı qüvvəyə minib.

Dövlət başçısının “Bələdiyyə torpaqlarının idarə edilməsi haqqında” AR Qanununda dəyişikliklər edilməsi barədə AR Qanununun tətbiqi haqqında 2 fevral tarixli sərəncamına əsasən, mülkiyyətinə fərdi yaşayış evinin tikintisi üçün torpaq sahəsi əldə etmiş şəxs həmin torpaq sahəsini beş il müddətində özgəninkiləşdirə bilməz. Belə məhdudiyyət bələdiyyənin qərarında və bu Qanunun 6.2-ci maddəsinə əsasən tərəflər arasında bağlanmalı olan müqavilədə nəzərdə tutulmalıdır

İctimai müzakirələr göstərir ki, çoxları məsələnin belə qoyulması ilə razıdır. Belə ki, bir çox hallarda torpaq spekulyasiya predmetinə çevrilir ki, bu da bazarda torpaq qiymətlərinin və bununla əlaqədar mənzil, inşaat materialları və s. qiymətlərinin süni şəkildə artırılmasına gətirib çıxarır.

Eyni zamanda hüquqşünaslar hesab edirlər ki, torpaq satışına qanunvericiliklə qoyulan məhdudiyyətlər Mülki Məcəllədə nəzərdə tutulmuş mülkiyyət hüquqlarına ziddir. Bəzi konkret hallarda (mülkiyyətçinin daimi əsaslarla ölkəni tərk etməsi) bu, çətinliyə səbəb ola bilər. Onların fikrincə, torpaq alqı-satqısı üzrə sövdələşmələrdə spekulyasiyalara qarşı yüksək vergilər tətbiq etməklə də müzakirə aparmaq olar. -08B-