Sığorta bazarında 9,7% artım var

2016-cı ildə sığorta şirkətləri 486 mln 74 min manat sığorta haqları toplayıb, deyə Maliyyə Bazarlarına Nəzarət Palatası məlumat verir.

Bu, 2015-ci ildəkindən 9,7% və ya 42 mln 855 min manat çoxdur.

Hesabat ilində sığorta şirkətləri tərəfindən həyata keçirilən ödənişlərin həcmi də illik müqayisədə 57 milyon 009 min manat və ya 31,63% artaraq 237 mln 250 min 616 manata çatıb.

Həyat sığortası bazarı 26% artıb.

Sığorta yığımlarının 146 milyon 538 min manat və ya 30,2%-i, ödənişlərin 94 milyon 979 min manat və ya 40,0%-i həyat sığortasının payına düşüb.

2016-cı ildə yığımların 65,66%-i könüllü, 34,34%-i icbari sığorta növlərinin payına düşüb.

Könüllü sığorta bazarı 2015-ci illə müqayisədə 37 milyon 974 min manat və ya 13,52% artaraq 2016-cı ildə 318 milyon 944 min manat təşkil edib. Ödənişlər isə illik 43 milyon 623 min manat və ya 32,12% artaraq 179 milyon 435 min manata yüksəlib.

İcbari sığorta bazarı 3% artıb

İcbarı sığorta növləri üzrə yığımlar 4 milyon 881 min manat və ya 3,01% artaraq 166 milyon 816 min manata yüksəlib. Hesabat ilində icbari növlər üzrə ödənişlər 13 milyon 386 min manat və ya 30,13% artaraq 57 milyon 815 min manat olub. 71D