Şitillərin hesabına ölkə ərazisinin 11,8%- meşədir

Nazirlər Kabinetinin 2014-cü ilin 9 ayının sosial-iqtisadi inkişafının yekunlarına həsr edilmiş iclasında ekologiya və təbii sərvətlər naziri Hüseynqulu Bağirov deyib ki, ölkə ərazisinin 11,8%- meşədir. Son 10 ildə 80 mln ağac əkilib. O, bitən ağacların sayını açıqlamayıb.

Onun sözlərinə görə, bu il meşə fondu torpaqlarında 1 144 hektar sahədə yeni meşələr salınmış və meşə səpini işləri aparılıb 2 milyon 242 min ağac əkilib. 8160 kubmetr həcmində 10 yeraltı dəmir-beton su anbarı, 200 min kubmetr həcmində 7 torpaq su anbar inşa edilib. Müxtəlif bölgələrdə 1700 hektar sahədə 1,1 milyondan artıq əsasən xaricdən gətirilmiş daha məhsuldar və davamlı zeytun tingləri əkilib. Azərbaycanda tarixən yaradılmış zeytun bağlarından hazırda 900 hektara qədəri qorunub saxlanılıb. Son 2 il yarımda əkilmiş zeytun ağaclarının hesabına onların sahəsi 3 dəfə artaraq 2 600 hektara çatıb.

Məmur bildirib ki, həyata keçirilmiş tədbirlər nəticəsində xüsusi mühafizə olunan təbiət ərazilərinin ümumi sahəsi 2003-cü ildən etibarən təxminən 2 dəfə artırılaraq ölkə ərazisinin 10,3 faizinə çatdırılıb. Qızılağac Dənizkənarı Milli Parkının və “Zaqatala-Balakən Biosfer Rezervatının” formalaşdırılması istiqamətində iş gedir və bu prosesin yekunlaşması ilə xüsusi mühafizə olunan ərazilərin sahəsi ölkə ərazisinin təxminən 13 faizini təşkil edəcək.

Atmosferə tullantılarla mübarizə tədbirləri ilə 21 müəssisə bağlanılıb. 32-nin fəaliyyəti məhdudlaşdırılıb. Daha 17 mənbə isə ləğv edilib. --17D—