SOCAR 2017-ci ilə kimi Bakını QDM ilə əhatə etmək istəyir

 Azərbaycan Respublikası Dövlət Neft Şirkəti (SOCAR) 1,5 il ərzində bütün Bakını qazdoldurma məntəqələri ilə əhatə etmək istəyir, deyə SOCAR prezidenti Rövnəq Abdullayev deyib.

O bildirib ki, ilk qazdoldurma məntəqəsi “Baku Bus” şirkətinin avtobus deposu ərazisində tikilib: “Hazırda SOCAR Zabrat qəsəbəsi ərazisində ikinci qazdoldurma məntəqəsini tikir. Planlarımıza 1,5 il ərzində bütün Bakını qazdoldurma məntəqələri ilə əhatə etmək daxildir. Gələcəkdə ölkənin iri şəhərlərarası magistral yollarının hər 180 kilometrində qazdoldurma məntəqələri tikəcəyik”, deyə o qeyd edib.

SOCAR yaxın gələcəkdə neft məhsulları satışında maye qazın payını 30-35%-ə çatdırmaq istəyir.

Qeyd edək ki, SOCAR 2013-cü ilin dekabrında (o vaxt neft məhsulları 32% bahalanıb) hökumətə “Daxili bazarda neft məhsullarına tələbatı azaltmaq haqqında” layihə təqdim edib. Layihədə ictimai və kommersiya nəqliyyatının tədricən maye qaza keçməsi təklif edilir. Nəticədə, əvvəla, yanacaq istehlakı azalır, ikincisi, yanacağın ekoloji növü, üçüncüsü yanacaq xərclərinin azalması xidmət haqqının bahalanmasına şərait yaratmayacaq. Nəhayət, sərbəst qalan dizel yanacağını xarici bazarda daha baha satmaq olar. 

Amma proses zəif gedir, əminlik yoxdur ki, proqnozlaşdırılan vaxta - 2017-ci ilin əvvəlinə kimi real olsun. –12С--