SOCAR-in «Qərb» marşrutu ilə ixrac tədarükü azalib

2013-cü ilin yanvar-iyul aylarının nəticələrinə görə Azərbaycan Dövlət Neft Şirkəti (SOCAR) Supsa limanından Bakı-Supsa neft kəməri ilə nəql edilən 1 mln 522 min 370 ton Azərbaycan nefti ixrac edib. Bu barədə SOCAr-ın mətbuat xidməti məlumat yayıb. 

2012-ci ilin yanvar-iyul ayı ilə müqayisədə Azərbaycan neftinin «qərb» marşrutu ilə ixracı 5,6% azalıb. 

2013-cü ilin iyul ayında Supsa limanından SOCAR 157 min 690 ton Azərbaycan nefti göndərib. 

Hazırda Bakı-Supsa boru kəmərinin texniki imkanları sutkada 106 min barel yaxud ildə 5,2 mln ton neft ixracını həyata keçirməyə imkan verir. Ancaq 2012-ci ilin yekunlarına görə, bu boru kəməri ilə ümumilikdə 3,9 mln ton Xəzər nefti ixrac edilib. 2011-ci ildə bu göstərici 3,8 mln ton təşkil edib. 

 Qeyd edək ki, Bakı-Supsa ilə «Azəri-Çıraq-Günəşli» layihəsi (operator - BP) çərçivəsində «Çıraq» yatağından hasil edilən neft ixrac edilir. 

Xatırladaq ki, Bakı-Supsa boru kəməri 1999-cu ilin aprel ayında istismara verilib. Onun Azərbaycan nefti ilə doldurulması 1998-ci ilin dekabrın 10-dan başlayıb. 1999-cu ilin yanvarın 5-dən müqavilə nefti Azərbaycan-Gürcüstan sərhədini keçib. Həmin ilin aprelin 9-dan Supsa terminalından Azərbaycan nefti ilə dolu ilk tanker dünya bazarlarına göndərilib. Bakı-Supsa boru kəmərinin ümumi uzunluğu 829 km təşkil edir, onun 443 km Azərbaycan ərazisinə düşür. Boru kəmərinin ilkin layihə daşınma qabiliyyəti sutkada 110 min barel təşkil edirdi. 2000-ci ilin iyul ayında boru kəmərinin daşınma qabiliyyəti sutkada 125 min barelə, 2001-ci ildə isə – 130 min barelə (ildə 6,5 mln ton) çatdırıldı. Boru kəmərinin tikintisinə ilk kapital xərcləri $560 mln təşkil edib. --12B--