SOCAR İrana Azərbaycanın qaz anbarlarından istifadə etməyi təklif edib

SOCAR (Azərbaycan Dövlət Neft Şirkəti, ARDNŞ) İrana qazın saxlanması və gələcəkdə bu ölkənin şimal regionlarına nəql edilməsi üçün Azərbaycanın qaz anbarlarından istifadə etməyi təklif edib. Bu barədə cümə günü jurnalistlərə SOCAR-ın prezidenti Rövnəq Abdullayev bəyan edib.

SOCAR prezidenti izah edib ki, qışda İran şimal regionlarının qaz təchizatı ilə əlaqədar problemlərlə üzləşir.

«Bununla əlaqədar SOCAR Naxçıvan Muxtar Respublikasının tələbatının ödənilməsi məqsədilə İrana qüvvədə olan svop tədarükləri çərçivəsində bu ölkənin şimal regionlarının təminatı üçün də əlavə qaz həcmləri nəql etməyə məcburdur. Lakin bizim qaz imkanlarımız tükənməz deyil, bu səbəbdən İran tərəfi ilə danışıqlar apararaq qışda ölkənin şimalını təmin etmək üçün zəruri olan həcmdə İran qazının yay aylarında bizim qaz anbarlarına vurulmasını təklif etmişik”, - deyə R.Abdullayev qeyd edib.

Xəbər verildiyi kimi, hazırda muxtar respublikanın tələbatını ödəmək üçün Azərbaycandan İrana svop əməliyyatı çərçivəsində sutkada 1,3 mln. kubmetr qaz nəql edilir. Naxçıvan MR-in Azərbaycanın əsas ərazisi ilə ümumi sərhədi yoxdur və İran, Ermənistan və Türkiyə ilə həmsərhəddir. Hazırda Naxçıvana qaz tədarükü İrana Astara-Qazıməmməd magistral qaz kəməri vasitəsilə həyata keçirilir.

Azərbaycanda iki yeraltı qaz anbarı var – “Qalmaz” və “Qaradağ”. “Qalmaz” yeraltı qaz anbarı Bakıdan 75 km cənub-şərqdə yerləşir və 1955-ci ildə istismara verilib. “Qaradağ” yeraltı qaz anbarı Bakıdan 25 kilometr cənub-şərqdə yerləşir və 1954-cü ildə işə salınıb. Yenidənqurma işləri nəticəsində yeraltı qaz anbarlarının ümumi həcmi 3,5 mlrd kubmetrdən 6 mlrd kubmetrə artırılıb. –12D--