SOCAR Trading-in fəaliyyəti SOCAR-ın gəlirlərini kəskin şəkildə artırıb

2013-cü ildə Azərbaycan Dövlət Neft Şirkətinin (SOCAR) gəliri 38 mlrd. 433 mln. manat təşkil edib ki, bu da 2012-ci ilin göstəricisindən 2,2 dəfə çoxdur. Bu barədə SOCAR-ın 2013-cü il üçün birgə maliyyə hesabatında deyilir.

Bu məlumatlara əsasən, 2013-cü ildə SOCAR-ın neft satışından gəliri 2012-ci il ilə müqayisədə 2,5 dəfə artaraq, 25 mlrd. 319 mln. manat təşkil edib.

Ötən il neft məhsulları satışından gəlir 8 mlrd. 951 mln. manat təşkil edib (artım 2,7 dəfə).

2013-cü ildə SOCAR neft-kimya məhsullarının satışından 1 mlrd. 854 mln. manat təşkil edib (azalma 8,7%).

2013-cü ildə SOCAR-ın qaz satışından gəliri 2012-ci il ilə müqayisədə 26,4% artaraq, 1,4 mlrd. manat təşkil edib.

Dövlət Neft Şirkətinin digər gəlirləri 909 mln. manat təşkil edib (artım 62,9%).

SOCAR-ın gəlirlərində birdən-birə bu artım necə oldu? Axı şirkətin gəlirləri faktiki olaraq dəyişmirdi, 2012-ci ildə 955 mln. dollar müqabilində 2013-cü ildə 977 mln. dollar təşkil edib. Hesabatda göstərilir ki, SOCAR-ın gəlirinin 33,077 mlrd. manatı marketinq fəaliyyəti nəticəsində (neft və neft məhsullarının satışı) formalaşıb. Yəni bir il ərzində Dövlət Neft Şirkəti marketinq fəaliyyətindən gəlirini 2,8 dəfə artırıb.

Lakin audit hesabatında göstərilir ki, 2013-cü ilin yekunlarına görə İsveçrədə SOCAR-ın gəliri 3,332 mlrd. manat müqabilində 30,687 mlrd. manat təşkil edib. Yəni təkcə bir ölkədə gəlirlər 9 dəfədən çox artıb.

Bu isə yalnız SOCAR Trading şirkətinin (dövriyyə) fəaliyyətinin genişləndirilməsi və ya 1 iyul 2013-cü ildən etibarən Amerikanın Exxon Mobile şirkətinə məxsus Esso Switzerland şirkətinin tamamilə SOCAR Trading-in hüquqi idarəetməsinə keçməsi sayəsində mümkün ola bilərdi.

Digər tərəfdən, Birləşmiş Ərəb Əmirliklərində (BƏƏ) eyni seqmentdə SOCAR-ın gəliri 26,7 dəfə azalaraq, 246 mln. manat təşkil edib. -12А-