BTC ilə 250 mln ton neft nəql edilib

 İlin I yarısında Bakı-Tbilisi-Ceyhan kəməri ilə 14 mln 543,14 min ton Azərbaycan nefti (ötən ilin eyni dövründəkindən 4,2% az) nəql edilib. 

ARDNŞ-nin məlumatına görə, iyun ayı ərzində BTC əsas ixrac boru kəməri vasitəsilə 2 milyon 343 min 834 ton neft nəql olunub. Bunun 301,587 min tonu Türkmənistan və Qazaxıstan neftidir. Cari ilin yanvar-iyun aylarında bu kəmərlə 14 milyon 543 min 140 ton neft ötürülüb. Ümumiyyətlə, kəmər istifadəyə verilən gündən 2014-cü il iyul ayının 1-ə qədər BTC-yə 249 milyon 684 min 733 ton neft vurulub.

Bu ilin I yarısında Ceyhan limanında 14 mln 282,527 min ton neft (ötən ilin eyni dövründəkindən 4,8% az), iyunda 2 mln 579,385 min ton Azərbaycan neft yüklənib. BTC istismara veriləndən terminalda 247 mln 426,441 min ton Azərbaycan nefti  yüklənib.

BTC-nin uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindədir. Buraxılış qabiliyyəti ildə 50 mln ton neftdir.

Layihə iştirakçıları bunlardır:  BP (30.1%);  ARDNŞ (25.00%);  Chevron (8.90%);  Statoil (8.71%);  TPAO(6.53%);  ENI (5.00%);  Itochu (3.40%);  ConocoPhillips (2.50%);  INPEX (2.50%),  Total (5.00%) və ONGC (2.36%). --17D—