Subsidiyalar fermerlərə çatmır

“Azərbaycan Respublikası regionlarının 2009 -2013-cü illərdə sosial-iqtisadi inkişafı Dövlət Proqramı"nın icrasının dördüncü ilinin yekunlarına həsr olunmuş konfransda prezident İlham Əliyev kənd təsərrüfatı subsidiyalarının verilməsində mənfi hallardan danışıb. «Subsidiyalar ünvanına çatmır, ya da onları kimsə mənimsəyir», deyə dövlət başçısı bildirib. 

Aqrar sektorda vəziyyəti şərh edən prezident Kənd Təsərrüfatı Nazirliyini fəaliyyətsizlikdə ittiham edib. Konkret ünvan göstərmədən tapşırıqlarının yerinə yetirilmədiyini bildirib. Paralel olaraq o, “ehtiyac və tələbatı nəzərə alıb” onlara kredit verən İqtisadi İnkişaf Nazirliyini tərifləyib.

Prezident qeyd edib ki, bir sıra hallarda, ümumiyyətlə, istehsal olunan məhsulun həcmi, torpaq sahələri artırılır ki, subsidiyalar daha çox götürülsün. “Subsidiyaların bir hissəsi dövlət məmurlarının cibinə gedir” deyə İlham Əliyev bildirib. Bəzi hallarda xaricdən lazım olan avadanlıqlar və digər vasitələr yüksək qiymətlə gətirilir. Bütün bu iradlar Kənd Təsərrüfatı Nazirliyi və onun yanında “Aqrolizinq” ASC-yə yönəldilib.

İlham Əliyev hökumətə yenidən tapşırıb ki, fermerlərə kənd təsərrüfatı subsidiyalarının verilməsi mexanizmini təkmilləşdirmək üzrə təkliflər hazırlasın. Fermerlərə müraciət edib ki, problemlər barədə ona məlumat versinlər. 

2013-cü ildə hökumət kənd təsərrüfatı müəssisələri və fermer təsərrüfatlarına 125 mln manat subsidiya verməyi nəzərdə tutur.  08D