Tikinti fəaliyyətinin layihələndirilməsinin yeni normaları hazırlanır

Azərbaycanda müxtəlif növ tikinti fəaliyyətinin layihələndirilməsinin yeni normaları hazırlanır. Dövlət Şəhərsalma və Arxitektura Komitəsi bu işi İnşaat və Memarlıq Elmi-Tədqiqat İnstitutuna tapşırıb.

Dövlət satınalmaları üzrə müqavilə reyestrinə əsasən, institut dəmir yolu və avtomobil yollarının tunelləri, meliorasiya sistemləri və qurğuları, hidrotexniki qurğuların beton və dəmir-beton konstruksiyaları, o cümlədən armaturlu sement konstruksiyaların layihələndirmə normalarını hazırlayır.

İnşaat və Memarlıq Elmi-Tədqiqat İnstitutunun mütəxəssisləri idarə və təşkilatlar üçün bina və otaqlar, istehsalat binaları, eləcə də binaların istilik mühafizəsinin layihələndirmə normalarını hazırlayır.

İnstituta həmçinin tikinti sənayesinin inkişafı nəzərə alınmaqla, yüksəkmərtəbəli zəlzələyədavamlı polad konstruksiyalı binaların səmərəli konstruktiv sxemlərinin hesablanma metodikasının işlənməsi və layihələndirmə üçün vəsait hazırlamaq həvalə edilib. 

Son vaxtlar yol örtüyünün tərkibində əhəng daşının qalıqları geniş istifadə olunur. Mütəxəssislər qeyd edir ki, bu asfalt-beton avtomobil yollarının istismar müddətini və keyfiyyətini artırır. İndi DŞAK bu qalıqların süni düzücü materialların tərkibində istifadə edilməsinin mümkünlüyü öyrənir.

Normaların hazırlanması üzrə müqavilənin qiyməti 200 min manatdır.

Qeyd edək ki, «Dövlət satınalmaları haqqında» qanun tabe təşkilatla satınalma müqaviləsi bağlamağı qadağan edir. Memarlıq Elmi-Tədqiqat İnstitutu DŞAK-ın strukturuna daxildir. Komitənin yanında həmçinin “Azərmemarlayihə» Dövlət Baş Layihə institutu və Bakı Dövlət Layihə İnstitutu fəaliyyət göstərir. 08B