Toxum Fondu yaxşi şey vəd etmir

Azərbaycan prezidentinin “Kənd təsərrüfatının inkişafına dövlət dəstəyinin gücləndirilməsi ilə bağlı əlavə tədbirlər haqqında” sərəncamı ilə Dövlət Toxum Fondu yaradılacaq. Fond Kənd Təsərrüfatı Nazirliyinə tabe olacaq.

Ölkədə ərzaq təhlükəsizliyinin daha da gücləndirilməsi məqsədilə yüksək məhsuldarlığa malik və quraqlığa davamlı yeni növ toxumlara tələbat artıb. Bu səbəbdən Fond ölkədə məhsul istehsalçılarının yüksək məhsuldar toxumlara tələbatını ödəyəcək.

Fondun fəaliyyətinin təminatı, habelə yüksək məhsuldar toxumların istehsalının və tədarükünün həyata keçirilməsi üçün dövlət büdcəsindən 10 mln. manat ayrılacaq.

Qeyd edək ki, “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”nın cari ildə maliyyələşdirilməsinə  dövlət büdcəsindən 186,2 mln. manat ayrılacaq ki, bu da 2014-cü ildə olduğundan 42,1% çoxdur. Dövlət Toxum Fondunun yaradılması üçün büdcə vəsait bu Dövlət Proqramı çərçivəsində ayrılıb.

Aqrar sektor üzrə ekspert Vahid Məhərrəmov hesab edir ki, toxumçuluq problemini yalnız  sərəncamla həll etmək olmaz. Bundan ötrü bu sahəni hərtərəfli əhatə edən Dövlət Proqramı qəbul olunmalıdır. Eyni zamanda onun fikrincə, ixtisaslaşdırılmış Dövlət Fondunun yaradılması vəziyyətdən çıxış yolu deyil. “Fövqəladə Hallar Nazirliyi (FHN) yanında Dövlət Taxıl Fondunun fəaliyyətinin təcrübəsi göstərdi ki, belə qurumlar yerli fermerçiliyin inkişafında maraqlı olmayan məmurların zənginləşdirilməsi üçün alətə çevrilir. Onu demək kifayətdir ki, DTF-in taxıl ehtiyatları Rusiya və Qazaxıstan idxalının hesabına formalaşır”, - o bildirib.

Qeyd edək ki, Kənd Təsərrüfatı Nazirliyi nəzdində bir neçə dövlət taxılçılıq müəssisəsi fəaliyyət göstərir və onların fəaliyyəti demək olar ki, nəzərə çarpmır.  Həmçinin “Azərtoxum” MMC fəaliyyət göstərir ki, onun təsisçilərindən biri “Azərbaycan İnvestisiya Şirkəti” dövlət ASC-dir.08B