Türkiyə iş adamı Azərbaycanda pulunun ələ keçirildiyini bildirib

Azərbaycanın “Xəmsə-M” cəmiyyətinin rəhbəri Mürvət Həsənli Türkiyənin “Emre Piliç” şirkətinə olan borcunu ödəməkdən imtina edir. Bu barədə martın 10-da Bakıda Four Seasons otelində mətbuat konfransında “Emre Piliç” şirkətinin rəhbəri Ömür Oral bildirib.

Onun sözlərinə görə, “Xəmsə-M” MMC-nin rəhbəri Mürvət Həsənli Türkiyənin toyuq məhsulları müəssisəsi “Emre Piliç” şirkətinin  1,7 milyon dollar məbləğində vəsaitini qanunsuz şəkildə ələ keçirib.

“Azərbaycan Baş Prokurorluğu yanında Korrupsiyaya qarşı Mübarizə Baş İdarəsində araşdırma zamanı Həsənli borcu tam şəkildə etiraf edib. Baş İdarənin tövsiyəsi ilə tərəflər 2016-cı il noyabrın 12-də “Borcun etirafı haqqında Müqavilə” bağlayıb. Tərəflər arasında razılaşmaya əsasən, borcun məbləği 1 milyon 300 min dollara endirilib. Buna baxmayaraq, Həsənli borcu qaytarmaqdan imtina edir”, - deyən Ömür Oral müqavilənin surətini jurnalistlərə təqdim edib.

Onun sözlərinə görə, şirkəti 2008-ci ildən Azərbaycanda fəaliyyət göstərir və ölkənin broyler sənayesinin inkişafında mühüm rol oynayıb.

“Şirkətimiz Azərbaycanda sağlam ana toyuq və damazlıq yumurta istehsalını təşkil edib. 2013-cü ildə “Siyəzən Broyler”dən götürdüyümüz qan nümunələrində Türkiyədə laborator analizi zamanı quş qripi və digər xstəliklər aşkar olundu. Biz “Siyəzən Broyler”i yenidən qurduq, Türkiyədən və Fransadan ana toyuqlar gətirdik, müəssisə gəlirlə  işləməyə başladı”, deyə o qeyd edib.

Ömür Oral deyib ki, “Emre Piliç” şirkətinin “Siyəzən Broyler” ASC-yə damazlıq yumurta satması nəticəsində  ümumilikdə 3,8 milyon dollar borc yaranıb. “Siyəzən Broyler” pulu Mürvət Həsənliyə verib. Həsənli 2,1 milyon dolları İstanbulda nəğd şəklində mənə verib. Qalan 1,7 milyon dolları isə qaytarmır”, deyə o qeyd edib. 

Ömür Oral problemin həlli üçün Azərbaycan prezidentinə, birinci vitse-prezidentə, baş prokurora və digər rəsmi qurumlara dəfələrlə müraciət edib.

“Müraciətlərimin hər hansı nəticəsi yoxdur. Mənə deyirlər ki, bu şirkətlər çox yüksək vəzifəli şəxslərin himayəsindədir. Müraciətlərimdən sonra prezidentin köməkçisi Əli Həsənovun nəzarətində olan media orqanlarında əleyhimə yazılar dərc olunmağa başlayıb. Mən buradan bəyan edirəm ki, türkəm, babam isə Şəkinin Göynük kəndindən köçüb. Ermənistan vətəndaşı olan şəxslərlə də hər hansı ticarət əlaqəm yoxdur”, Oral əleyhinə yazılan  məqalələrə belə cavab verib.

Onun sözlərinə görə, M.Həsənli İstanbula gedərək onu və ailə üzvlərini hədələyib.

“Ölkə başçısı çıxışlarında xarici investisiyaların cəlb edilməsi və qorunması ilə bağlı məmurlara tapşırıqlar verir. Xarici iş adamları bizim başımıza gətirilənləri görüb Azərbaycana sərmayə qoymaqdan çəkinir və ziyana düşməmələri üçün burada fəaliyyətini dayandırır. Mənim rəhbərlik etdiyim şirkət dünyanın 14 ölkəsinə məhsul satır, amma Azərbaycan baba yurdumdur”, deyə o qeyd edib.

Vəkil Aslan İsmayılov isə bildirib ki, onu şirkətin hüquqlarını müdafiə etdiyinə görə həbs də gözləyə bilər. 

“Bu problem ortaya çıxanda ilk danışıqları Milli Məclisin deputatı, Onkologiya Mərkəzinin maliyyə direktoru Kəmaləddin Qafarov aparırdı. O, “Siyəzən Broylerin” bütövlükdə borcunu Mürvət Həsənova ödədiyini dedi. Mürvət Həsənov borcu ödməkdən imtina edir. Baş Prokuror yanında Korrupsiyaya qarşı Mübarizə Baş İdarəsi isə şikayətimzə ilk anda çox diqqətlə baxdığı halda, sonradan bunun mülki iş olduğunu bildirdi və məhkəməyə müraciət etməyimizi məsləhət bildi”, deyə vəkil qeyd edib.

Şirkət rəhbəri Ömür Oral ölkə prezidentiə müraciət edərək, problemin həllində kömək göstərməsini xahiş edib.

Öz növbəsində, Mürvət Həsənov 2 saylı İnzibati-İqtisad Məhkəməsində “Emre Piliç” şirkətinə qarşı iddia qaldıraraq, vasitəçilik xidməti göstərdiyinə görə 4 milyon 800 min dollar vəsaitin xeyrinə  tutulmasını istəyir. -03C-

Rəy yaz

İqtisadiyyat

Bizi sosial şəbəkələrdə izləyin

Xəbər lenti