Türkmənistan qaz nəql etməyə hazırdır, amma Transxəzəri tikmək istəmir

 Azərbaycan, Türkiyə, Türkmənistan və Avropa İttifaqı Xəzər bölgəsindən Avropaya qaz nəqli məsələsinin həlli üçün işçi qrup yaradacaq. Bu barədə çərşənbə günü Azərbaycanın energetika naziri Natiq Əliyev jurnalistlərə bildirib.

Onun sözlərinə görə, bu razılaşma bu yaxınlarda Türkmənistanda Energetika üzrə Avropa Komissiyasının vitse-prezidenti Şefkoviçin Azərbaycan, Türkiyə və Türkmənistanın energetika nazirləri ilə görüşündə əldə edilib.

Onun sözlərinə görə, Azərbaycandan işçi qrupun tərkibinə Energetika Nazirliyinin, SOCAR-ın, XİN-in və Ədliyyə Nazirliyinin nümayəndələri daxil olacaq.

Görüşdə Türkmənistan tərəfi Transxəzər boru kəmərinin çəkilməsində maraqlı olduğunu qeyd edib və yenidən Avropaya ildə 30 mlrd. kubmetr qaz nəql etməyə hazır olduğunu elan edib. Lakin Türkmənistan qazı yalnız Xəzərə qədər çatdırmağa hazırdır.

Buna görə Transxəzər qaz kəmərini kimin tikəcəyi və maliyyələşdirəcəyi məsələsi qalır. Bundan başqa, Türkmənistan qazının alıcısı məsələsi həll edilməlidir, deyə Əliyev bildirib.

Nazir həmçinin qeyd edib ki, Avropa İttifaqı qaz alıcısı kimi çıxış edəcək Avropa Energetika Şirkətlərindən ibarət Xəzər Konsorsiumu yaradılmasını nəzərdə tutur. -02D-