Unibank-da pul köçürmələri dövriyyəsi dörddə bir artıb

Son bir il ərzində təcili pul köçürmələri sistemləri üzrə “Unibank”-ın dövriyyəsi 25,3% artaraq 60 milyon manata çatıb. Bankın filialları vasitəsi ilə yanvar-avqust aylarında 112,5 min təcili pul köçürməsi həyata keçirilib. Bu, ötən ilin müvafiq dövrü ilə müqayisədə 32% çoxdur.

Bankdan verilən məlumata görə, ilin əvvəlindən əməliyyatların orta aylıq sayı ikiqat artıb. Nəticədə pul köçürmələri seqmentində Bankın aylıq dövriyyəsi yanvar-avqust aylarında 70% artıb, gün ərzində qeydə alınan köçürmələrin məcmu məbləği isə 500 min manata yaxınlaşıb. 9 regional filialda təcili pul köçürmələri üzrə əməliyyatların həcmi ümumi dövriyyənin 43%-i təşkil edib. Gəncədəki iki filialın payı avqust ayında 15%-yə çatıb. 

Qeyd etmək lazımdır ki, hər pul köçürmə əməliyyatının orta məbləği 545 manat təşkil edib. Gün ərzində 500$/500 EUR (və ya 20000 RUR) və daha çox məbləğdə vəsait göndərən və alanlar “Unibank”-dan bonus kimi mobil telefon danışıqları üçün pulsuz kart əldə edirlər. 

Hazırda Bank 13 beynəlxalq pul köçürmələri sistemi ilə əməkdaşlıq edir. Onlar sırasında “Western Union”, “Bıstraya Poçta”, “Contact”, “Faster”, “Migom”, “Lider”, “Zolotaya Korona”, “Blizko”, “Coinstar”, “Allure” və “PrivatMoney” kimi beynəlxalq pul köçürmələri sistemləri var. --15D--