Vergilər Nazirliyi haqqında Əsasnaməyə dəyişikliklər edilib

İyulun 23-də Azərbaycan Respublikasının prezidenti İlham Əliyev “Azərbaycan Respublikasının Vergilər Nazirliyi haqqında Əsasnamə”yə dəyişikliklər edilməsi barədə fərman imzalayıb. 

Yeni dəyişikliklər Əsasnaməni ötən ilin dekabrında dəyişikliyə məruz qalan Vergi Məcəlləsinə uyğunlaşdırmaq məqsədi daşıyır. 

Son yeniliyə əsasən, vergi ödəyicilərinin vergidən yayınması və vergi qanunvericiliyinin pozulması faktları barədə şəxslərdən müraciət daxil olduqda, müraciətdə qeyd edilən faktları həmin vergi ödəyicilərində növbəti operativ vergi nəzarəti tədbiri və ya növbəti səyyar vergi yoxlaması keçiriləcək və vergi nəzarəti başa çatdıqdan sonra nəticələri barədə müraciət edən şəxslərə məlumat veriləcək. 

Kommersiya hüquqi şəxslərin təsisçiləri (iştirakçıları) və onların nizamnamə kapitalındakı payları barədə məlumatlar yalnız Vergilər Nazirliyində saxlanılacaq. Dövlətstatkom, DSMF və başqa strukturlara digər informasiyalar kommersiya hüquqi şəxslərin reyestrindən veriləcək. Məlumdur ki, 2011-ci ilin iyunundan Azərbaycanda kommersiya hüquqi şəxslərin təsisçiləri barədə informasiya kommersiya sirri sayılır. 

Vergilər Nazirliyi elektron audit məqsədi iləm ühasibat uçotu elektron formatda aparıldığı halda vergi ödəyicisindən məlumatlarının verilməsini, həmin məlumatlara birbaşa və ya məsafədən çıxış imkanının yaradılmasını tələb edə bilər.  Bundan başqa, vergi əməkdaşları məhkəmə qaydasında dövlət büdcəsinə vergi borcu və faizlərin, tətbiq edilən sanksiyaların ödənişi barədə maliyyə sanksiyası qaldıra bilər. 

Vergi xidməti və vergi ödəyiciləri vergi risklərinin minimuma endirilməsi üçün vergi tərəfdaşlığı barədə saziş imzalaya bilərlər. 08D