Vergilər və maliyyə nazirlikləri kommersiya təşkilatlarının maliyyə hesabatlılığına nəzarət üzrə əməkdaşlıq edəcək

Nazirlər Kabineti kommersiya təşkilatlarının maliyyə hesabatlılığı qaydalarına düzəliş edib. Qaydalar 27 may 2010-cu ildən qüvvədədir. Amma kommersiya təşkilatlarının az hissəsi ona riayət edir. 

Düzəlişə əsasən, kommersiya təşkilatının illik maliyyə hesabatlarının və birləşdirilmiş (konsolidə edilmiş) maliyyə hesabatlarının təqdim edilməsi barədə məlumatlar onların tabe olduqları yuxarı təşkilat və ya təsisçi (təsisçilər) tərəfindən bu hesabatların sonuncu təqdimetmə günündən sonra 10 gün ərzində Azərbaycan Respublikasının Maliyyə Nazirliyinə verilir. Dövlət zəmanəti ilə kredit alan və ya dövlət borcunun xərclənməsi ilə bağlı layihələrdə iştirak edən kommersiya təşkilatları da belə hesabatları audit rəyi ilə birgə Maliyyə Nazirliyinə verirlər. 

Düzəlişə əsasən, hesabat verməli olan şirkətlərin siyahısını Vergilər Nazirliyi ildə bir dəfə - mart ayının 31-dək Maliyyə Nazirliyinə təqdim edir.

Kommersiya təşkilatları həmin məlumatlardan sərbəst istifadə edilməsini təmin etmək şərtilə illik maliyyə hesabatının və birləşdirilmiş (konsolidə edilmiş) maliyyə hesabatlarının qanunla müəyyən edilmiş hallarda auditor rəyi ilə birlikdə həmin internet səhifəsində dərc etməlidir. Onlar auditor rəyi ilə birlikdə mətbu orqanda da dərc olunmalıdır.

Maraqlıdır ki, Mülki Məcəllə səhmdarların ümumi yığıncağının ilin I yarısından gec olmayaraq keçirilməsini nəzərdə tutur. Bir qayda olaraq, şirkətlər ümumi yığıncağı iyunda keçirir. «Kommersiya təşkilatının illik maliyyə hesabatlarının və birləşdirilmiş (konsolidə edilmiş) maliyyə hesabatlarının təqdim edilməsi qaydaları»nın tələbinə əsasən, maliyyə hesabatları səhmdarlar tərəfindən 30 apreldən gec olmayaraq təsdiq edilməlidir. Birləşdirilmiş (konsolidə edilmiş) maliyyə hesabatları yuxarı struktura və ya səhmdarlara 30 iyuna kimi təqdim edilməlidir. 08D