Xarici ticarət dövriyyəsi 11,7% azalıb

Bu ilin 5 ayında Azərbaycanın xarici ticarət dövriyyəsi $13 mlrd olub. Bu, ötən ilin eyni dövründəkindən 11,7% azdır. Qiymət ifadəsində idxal və ixracın azalma həcmi eynidir –$850 mln

Gömrük Komitəsinin məlumatına görə, Azərbaycandan ixracat həcmi ($9 480 mln) 8,6% azalıb.

Neft ixracı ($8,2 mlrd) 4,8%, neft məhsulları ixracı ($415 mln) 25,1%, qaz ixracı (189,3 mln) 45,2% azalıb. Amma karbohidrogenlər və onların emal məhsulları ($8,8 mlrd) ixrac strukturunda üstünlük təşkil edir - 93%.

İdxal həcmi 19,5% azalaraq $3,5 mlrd olub. Azalma əsasən dövlət sektorunun hesabınadır. 2013-cü ilin yanvar mayında dövlət müəssisələri $1 418 mln məbləğində mal idxal etmişdisə, bu il bu həcm $956 mln-a düşüb.

İlin əvvəlindən idxalın $1 mlrd 84 mln-u (30,8%) və ixracın 4 950 mln-u (52,2%) Avropa İttifaqının payına düşür. Xarici ticarət dövriyyəsinin müsbət saldosu $5 969 mln olub.

“Güzgü statistikası” prinsipi ilə müstəqil araşdırmalara əsasən, idxalın bir hissəsi gizlədilir və ya gömrükçülər tərəfindən dövlət büdcəsinə daxil olacaq vəsaiti mənimsəmək üçün ucuz göstərilir. Söhbət yüz milyonlarla dollardan gedir. 08D