Yeni il ərəfəsində Bakı Şəhər İcra Hakimiyyəti prezidentdən 10 mln. manat alıb

Prezident İlham Əliyev Bakı şəhərinin abadlaşdırılması və yenidən qurulması işlərinin sürətləndirilməsi üzrə əlavə tədbirlərin həyata keçirilməsi üçün bu il ikinci dəfə  2012-ci ilin dövlət büdcəsində nəzərdə tutulan prezidentin Ehtiyat Fondundan vəsait ayırıb.

Bakı Şəhər İcra Hakimiyyəti yeni il ərəfəsində bu dəfə 10 mln. manat alacaq. Əvvəlki sərəncamlarda olduğu kimi, bu dəfə də vəsaitin xərclənəcəyi  konkret istiqamətlər haqqında məlumat verilmir. Bu ilin sentyabrında prezident həmin mənbədən Bakı Şəhər İcra Hakimiyyətinə 20 mln. manat ayırmışdı.

Paytaxtın İcra Hakimiyyətinin balansında olan yaşayış evlərinin, avtomobil yollarının əsaslı təmiri üzrə işlərin aparılmasına 327 mln. manat həcmində dövlət investisiyası ayrılıb. 

Ekspertlər qeyd edirlər ki, 2006-cı ildən bu yana Bakı Şəhər İcra Hakimiyyəti şəhərin  abadlaşdırılması məqsədilə dövlət büdcəsindən 816 mln. manat alıb. 

Nəqliyyat Nazirliyinin avtomobil yollarının, körpülərin, keçidlərin və s. inşasına və əsaslı təmirinə ayırdığı vəsait bura daxil deyil.

Nazirlər Kabineti 2013-cü il üçün dövlət investisiyalarının paylanması barədə sərəncam verməyib. Bakı Şəhər İcra Hakimiyyətinin maliyyələşdirilməsinin həcminin 300 mln. manatdan az olmayacağı gözlənilir.  08D