Yeni neft-kimya kompleksinin tikintisinin başlanması ilin sonuna keçirilib

Yeni neft, qaz emalı, neft-kimya məhsulları istehsalı kompleksinin tikintisinin başlanması yenə dəyişilib. ARDNŞ prezidenti Rövnəq Abdullayev jurnalistlərlə söhbətində bildirib ki, tikintiyə ilin sonunda başlanılacaq. Ötən il 2013-cü ilin dövlət büdcəsi müzakirə edilən zaman kompleksin tikintisinə ilin ortasında başlanılacağı bildirilirdi. Bu ilin əvvəlində tikinti işlərini sentyabra keçirdilər. 

Xatırladaq ki, Neft Fondunun bu il üçün büdcəsində ARDNŞ-nin bui layihədəki payının maliyyələşdirilməsi üçün 211 mln 950 min manat nəzərdə tutulub. 

Bu ilin aprelində layihənin hazırlanması üçün yeni komissiya yaradılıb. Qeyri-rəsmi məlumata görə, rəhbərlik ARDNŞ-yə xərcləri optimallaşdırmaq tapşırığı verib. İlkin olaraq layihənin qiyməti $14 mlrd (bank kredit dərəcələri ilə) idi, ötən ilin iyununda $17 mlrd-a çatdırıldı.

Yeni kompleksin yaradılması gücü 1,7 mln ton hazır məhsul olan neft-kimya müəssisəsinin, gücü ildə 10 mln ton ilkin neft emalı olan neft emalı zavodunun, həmçinin ildə 10 mlrd kubmetr gücündə qaz emalı zavodunun tikintisini nəzərdə tutur. Neft emalının dərinliyi 95%, duru neft məhsullarının çıxışı 85% olacaq.

Perspektivdə qaz emalı zavodunun gücünü 15 mlrd kubmetrə çatdırmaq planlaşdırılır. Kompleksin tikintisi çərçivəsində 250 meqavat gücündə İES tikiləcək. Kompleks Səngəçal terminalının yaxınlığında olacaq. Onun 2020-ci ilin dekabrında istismara verilməsi planlaşdırılır. --12В--