Yük tranziti Azərbaycan üçün prioritet olur

Oktyabrın 21-də prezident İlham Əliyev Tranzit Yükdaşımalar üzrə Koordinasiya Şurası yaradılıb. İqtisadiyyat və sənaye naziri.Şahin Mustafayev Koordinasiya Şurasının sədri təyin edilib.

Şuranın tərkibinə Dövlət Gömrük Komitəsinin sədri Aydın Əliyev, Dövlət Sərhəd Xidmətinin rəisi Elçin Quliyev, Dövlət Dəniz Administrasiyasının rəisi Qüdrət Qurbanov, nəqliyyat nazirinin müavini Musa Pənahov, ədliyyə nazirinin müavini

Toğrul Musayev, xarici işlər nazirinin müavini Xələf Xələfov, “Azərbaycan Dəmir Yolları” Qapalı Səhmdar Cəmiyyətinin sədri  Cavid Qurbanov, “Azərbaycan Xəzər Dəniz Gəmiçiliyi” sədri Rauf Vəliyev, Dövlət Neft Şirkətinin vitse-prezidenti Elşad Nəsirov, “Bakı Beynəlxalq Dəniz Ticarət Limanı” QSC-nin baş direktoru

 Taleh Ziyadov daxil olub.

Koordinasiya Şurasının funksiyalarına ölkə ərazisindən dəmir yolları, dəniz nəqliyyatı, dəniz limanları və dəniz terminalları vasitəsilə tranzit yüklərin daşınmasında “bir pəncərə” prinsipi tətbiq etmək tapşırılır.

Şura dəmir yolları, dəniz nəqliyyatı, dəniz limanları və dəniz terminalları vasitəsilə tranzit yüklərin daşınması sahəsində vahid, çevik və şəffaf tarif siyasətinin həyata keçirilməsi, sərhədkeçmə prosedurlarının və daşıma proseslərinin asanlaşdırılması, habelə bu sahədə fəaliyyət göstərən dövlət qurumları arasında əlaqələndirmə işlərini təmin etməlidir.

Nazirlər Kabineti normativ hüquqi aktlarının bu fərmana uyğunlaşdırılmasını üç ay müddətində təmin etməlidir.
İqtisadiyyat və Sənaye Nazirliyi ölkənin dəmir yolları, dəniz nəqliyyatı, dəniz limanları və dəniz terminalları vasitəsilə tranzit yükdaşımalarla bağlı özündə yükdaşımaların vahid tariflərini, sərhədkeçmə prosedurlarını, yükdaşımalar üzrə daşıma qaydalarını və şərtlərini, o cümlədən müqavilələrin şərtlərini və bağlanma qaydasını, dövlət sərhədindən keçmə zamanı inzibati prosedurlara dair elektron müraciətlərin qəbulu və yüklərin daşınması sahəsində müqavilələrin elektron üsullarla bağlanması imkanlarını, yüklərin izlənməsi və daşıma prosesləri ilə əlaqədar digər məsələləri əks etdirən elektron portalın yaradılmasını təmin etməlidir.

Tariflərin formalaşdırılması Tarif (qiymət) Şurasının Katibliyi tərəfindən həyata keçiriləcək.

Azərbaycan prezidenti İlham Əliyev Tranzit Yükdaşımalar üzrə Koordinasiya Şurası haqqında Əsasnaməni də təsdiq edib. Şuranın əsas vəzifəsi tranzit dəhlizinin rəqabət qabiliyyətinin artırılması, əlavə yüklərin cəlb edilməsi, iş keyfiyyətinin yüksəldilməsidir. Koordinasiya Şurası ildə iki dəfə prezidentə hesabat verəcək.—0-