AMB-nin qeyd etdiyi müsbət dəyişikliklər neftin bahalanması ilə bağlıdır � Natiq Cəfərli

Bakı/22.06.17/Turan: Statistikada müsbət dəyişikliklər neftin bahalanması ilə bağlıdır, deyə iqtisadçı Natiq Cəfərli Mərkəzi Bankın tədiyə balansının yaxşılaşması ilə bağlı məlumatını şərh edərkən bildirib.

"2017-ci ilk 5 ayında neftin orta qiyməti 30% bahalanıb və 55 dollara çatıb. İndi də neft 44 dollardır, cəmi 2-3 ay belə qalsa, ÜDM-ın azalması sürətlənəcək, ticarət balansında mənfi saldo olacaq", deyə o bildirib.

N. Cəfərli uçot dərəcəsinin azalması (hazırda 15%-dir - müəllif) ilə bağlı deyib ki, bir neçə ilə əvvəl uçot dərəcəsi 2,5% olanda belə banklartın kredit faizi 20-25% idi.

"Yəni uçot dərəcəsinin aşağı-yuxarı olmasının elə bir ciddi təsiri yoxdur, amma avqusta faizlər aşağı düşəcəksə, deməli, manat kütləsi dövriyyədə artacaq, bu isə manatın ucuzlaşmasına səbəb olacaq", deyə iqtisadçı bildirib.

Xatırladaq ki, Mərkəzi Bank ilin ikinci yarısında iqtisadi və inflyasiya dinamikasından asılı olaraq uçot dərəcəsinin azaldılması potensialınının olduğunu qeyd edib. Bildirilir ki, Mərkəzi Bankın İdarə Heyəti avqustun 1-də uçot dərəcəsinin səviyyəsi məsələsinə yenidən baxacaq.

AMB Bankı manatın məzənnəsində əhəmiyyətli dəyişikliklər gözləmir.

"Bu ilin I rübündə tədiyə balansında müsbət dəyişikliklər baş verib, ötən ilin müvafiq dövrü ilə müqayisədə 2.5 mlrd dollar kəsir profisitlə (0.7 mlrd.dollar) əvəz olunub. Son 5 ayda xarici ticarət balansının profisiti ötən dövrlə müqayisədə 2 dəfə yüksəlib", deyə məlumatda bildirilir. 71D