Azərbaycan Türkdilli Dövlətlərin Banklar Assosiasiyaları Şurasının IV iclasında təmsil olunub

“Azərbaycan Banklar Assosiasiyası”nın (ABA) rəhbər heyəti “Özbəkistan Banklar Assosiasiyası”nın ev sahibliyi etdiyi, bu ölkənin paytaxtı Daşkənddə keçirilmiş Türkdilli Dövlətlərin Banklar Assosiasiyaları Şurasının IV iclasında iştirak edib.

Bu barədə ABA məlumat yayıb.

Məlumatda deyilir ki, tədbir çərçivəsində “Maliyyə trendləri – fintex və banklar, fırıldaqçılıqla mübarizə, İslam bankçılığının populyarlaşması” mövzusunda konfrans keçirilib. ABA-nın prezidenti Zakir Nuriyev konfransda çıxış edib. O, bildirib ki, türk dünyasının banklar assosiasiyalarının bir araya gəldiyi növbəti tədbirin belə qısa müddətdə təşkil edilməsi bu birliyə verilən önəmin yüksək olduğunu göstərir.

“Banklar və ümumilikdə maliyyə sektoru iqtisadiyyatın lokomotividir və onların birliyi iqtisadiyyatda əhəmiyyətli irəliləyişlərin əldə edilməsinə və yön verilməsinə ciddi dəstək olur. Türk bank icmalarının birgə fəaliyyəti də ölkələr arasındakı iqtisadi bağların daha da güclənməsinə imkan yaradacaq. Türkdilli Dövlətlərin Banklar Assosiasiyaları Şurası, o cümlədən ABA olaraq bu əməkdaşlığı davamlı dəstəkləyəcəyik. Azərbaycan bankları da qeyd etdiyim kimi Azərbaycan iqtisadiyyatının bir lokomotivi olaraq, öz inkişafını davam etdirir. Bu inkişafı, həm kəmiyyət, həm keyfiyyət, həm də rəqəmsallaşmada özünü göstərməkdədir”, – deyə Z.Nuriyev qeyd edib.

Türkdilli Dövlətlərin Banklar Assosiasiyaları Şurası 4 noyabr 2022-ci il tarixində еürkdilli dövlətlərlə mövcud münasibətlərin iqtisadi baxımdan daha da dərinləşdirilməsi və bu əsasda maliyyə-bank sistemləri arasındakı əlaqənin genişləndirilməsi məqsədilə yaradılıb. Şuranın II iclası 13 iyun 2023-cü il tarixində Bakıda baş tutub.