Azərbaycanda səhmlər və istiqrazlar məsafədən alınıb-satılacaq

Yaxın vaxtlarda Azərbaycanda səhm və istiqraz alıb-satmaq üçün “Bakı Fond Birjası”na (BFB) getməyə ehtiyac olmayacaq.

Yeniliyin anonsunu yerli mətbuata açıqlamasında BFB-nin baş kommersiya inzibatçısı Oqtay Qasımov verib.

Onun sözlərinə görə, bu, yeni elektron ticarət sisteminin işə salınmasından sonra mümkün olacaq və qiymətli kağızların ticarətini daha əlçatan edəcək.

"Yeni sistem artıq formalaşıb və funksionaldır. Sadəcə söhbət ona məsafədən qoşulmadan gedir. Yəni, bazar iştirakçılarına, investorlara investisiya şirkətlərinin mobil tətbiqləri üzərindən birjaya qoşulmaq imkanı verilməlidir. Burada da demək olar ki, işləri yekunlaşdırmışıq. Testlər tam həyata keçirilib və sistem real rejimdə fəaliyyət göstərir, yaxın günlərdə bu imkan yaradılacaq. İnvestisiya şirkətləri daxili texnoloji hazırlıq səviyyəsinə görə sistemə qoşulur. Artıq 2 şirkətdə qoşulma həyata keçirilib", - deyə o qeyd edib.