Naxçıvan Ali Məclisi muxtar respublikanın 2025-ci il büdcəsini təsdiqləyib

Naxçıvan Ali Məclisinin dekabrın 25-də keçirilmiş plenar iclasında muxtar respublikanın 2025-ci il büdcəsi III oxunuşda təsdiqlənib.

Gələn il yerli büdcənin gəlirlərinin 493,2 milyon manat, xərclərinin isə 505,2 milyon manat olacağı proqnozlaşdırılır.

Bunlar, ilkin variantla müqayisədə müvafiq olaraq 6,6% və 6,45% azdır. 2024-cü ilə nisbətən isə gəlir və xərc proqnozları müvafiq olaraq 3,2% və 2,2% azaldılıb.

Azalmaya səbəb 2025-ci ildə Azərbaycanın dövlət büdcəsindən Naxçıvan MR-na ayrılması nəzərdə tutulan dotasiyanın ilkin varianta nisbətən 10,9% və yaxud 34,8 milyon manat azaldılaraq 320,5 milyon manatdan 285,7 milyon manata endirilməsidir. Bu isə Naxçıvanın Dövlət Energetika Xidmətinin funksiyalarının “Azərenerji” və “Azərişıq” səhmdar cəmiyyələrinə, yerli Dövlət Su Ehtiyatları Agentliyinin funksiyalarının isə Azərbaycan Dövlət Su Ehtiyatları Agentliyinə ötürülməsi ilə bağlıdır. Odur ki, həmin yerli qurumların xərcləri artıq dövlət büdcəsində - mərkəzləşdirilmiş qaydada nəzərə alınır.