Moskvada azərbaycanlı rəssamın fərdi sərgisi

Bakı/12.04.19/Turan: Aprelin 23-də Moskvada tanınmış azərbaycanlı rəssam Müseyib Əmirovun fərdi sərgisi açılacaq.

"Günəşli küləyin blyuzu" adlı sərgi mayın 19-dək Zurab Sereteli qalereyasında nümayiş etdiriləcək.

Sərgiyə dair bukletdə deyilir ki, M.Əmirov azərbaycanlı rəssamların parlaq nümayəndələrindən biridir. Bütün dövrlərdə rəssam olmaq həm də bir qədər filosof olmaq deməkdir. Ancaq Müseyib Əmirov nəsli üçün bu, xüsusi anlam kəsb edib. M.Əmirov Abşeronun günəşli peyzajları ilə yanaşı ona toxunan, həyəcanlandıran və təəccübləndirən şeyləri də təsvir edir. O, sosrealizmdən uzaqdır, onu Franca rəssamlıq məktəbi, rus avanqardı cəlb edir. Onun kumirləri Enqr, Delakrua, Manedir.

Onun həqiqət axtarışları bizi elə bir dünyaya götürür ki, adamların və avtomobillərin cəmləşdiyi böyük şəhər belə bağ evinin həyəti qədər harmonikdir, gözəldir. Onların üzərində eyni buludlar uçuşur, onları eyni mələklər qoruyur.

Müseyib Əmirov 1963-cü ildə Bakıda anadan olub. 1987-ci ildə Dövlət İncəsənət Universitetini bitirib. 1996-cı ildən Azərbaycan Rəssamlar İttifaqının üzvüdür.

Lüksemburq, Paris, İstanbul, Vaşinqton, Berlin, Seulda sərgiləri nümayiş etdirilib. Onun işləri Azərbaycanda və xaricdə bir çox özəl kolleksiyalarda saxlanılır.-02B-