Amerikanın seçki praktikası digər ölkələrdə tətbiq oluna bilərmi?

ABŞ-ın seçki sahəsində təcrübəsi digər ölkələrdə tətbiq olunandırmı və Amerika seçki ənənələri nə ilə yaxşıdır? Seçkilərin demokratik kimi tanınması üçün hansı qaydalar lazımdır?

Seçki sahəsində İnnovasiyalar və Tədqiqatlar Mərkəzinin təsisçisi Devid Bekker Turan-ın müxbirinin bu sualarına cavab verərkən deyib ki, belə elementlər bir neçədir. Bu, seçki bülletenlərinə çıxış imkanıdır, seçicilərin iştirakı sadə və rahat olmalıdır. Namizədlər haqqında əlçatan məlumat olmalıdır.

"Lakin proses boyunca şəffaflıq həlledici əhəmiyyət daşıyır və ABŞ-da bu var. ABŞ-ın hər yerində siyasi partiyaların, namizədlərin və şirkətlərin müşahidəçiləri səslərin hesablanmasının aparıldığı seçki məntəqələrində və yerlərdə ola bilər. Onlar prosesə müdaxilə etmədikləri halda demək olar ki, hər yerdə ola bilərlər", - o deyib.

Gənc demokratiyaya malik ölkələrdə, əsasən Azərbaycan kimi ölkədə seçki prosesinin yaxşılaşdırılması üçün hansı tövsiyələr ola bilər?

Bu sualın cavabında Bekker qeyd edib ki, belə tövsiyələr verərkən  "ehtiyatlı" olmaq lazımdır.

"Səsvermə prosesi baxımından əldə tutmaq mümkün olan seçki bülleteninin olması vacibdir və mən rəqəmsal texnologiyaya keçidi tövsiyə etməzdim. Bu, ən yaxşı ppraktikadır, çünki bu bülletenə uzun müddət sonra baxmaq olar, ona görə də kağız vacibdir", - Bekker deyib.

Onun sözlərinə görə, daha bir vacib mövzu seçki zamanı dezinformasiyaya qarşı mübarizədir.

"Dünyadakı hər bir demokratiya görünməmiş dezinformasiya ilə üzləşir və bir çox hallarda bu, təkcə ölkə daxilində yox baş vermir,  həm də kənardan gəlir. Biz ABŞ və Avropada, eləcə də Asiya və Yaxın Şərq, Afrika və Cənubi Amerika ölkələrində bunun şahidi olduq. Və bu, dünyanın bütün demokratik ölkələrinin birləşib qabaqcıl təcrübələrini bölüşə biləcəyi sahələrdən biridir",  - Bekker deyib.