30 avqust Beynəlxalq İtkin Düşmüş Şəxslər Günüdür

Bakı/30.08.23/Turan: 30 avqust Beynəlxalq İtkin Düşmüş Şəxslər Günü kimi qeyd olunur. Beynəlxalq Qızıl Xaç Komitəsinin Bakı ofisinin press-relizində deyilir ki, Azərbaycanda hələ də 3,800-dən çox itkin düşmüş insan var.

Onların on minlərlə ailə üzvləri isə doğmalarının taleyini bilməməyin ağrısı ilə yaşayır.

BQXK səlahiyyətli dövlət qurumlarının itkin düşmüş şəxslərin taleyinin aydınlaşdırılması, onların ailə üzvlərinə cavab verilməsi istiqamətindəki işlərini dəstəkləmək üçün əlindən gələni əsirgəmir. Təşkilatın fəaliyyət göstərdiyi illər ərzində itkin düşmüş şəxslərin ailə üzvlərindən təqribən 11,000-ə yaxın bioloji istinad nümunəsi toplanaraq Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasına təhvil verilib.

Bundan başqa, Qızıl Xaç Komitəsi ehtimal edilən məzarlıqlar haqqında məlumatları əlaqədar qurumlarla bölüşüb və 3 rayonda aparılmış ekshumasiya layihələrinə texniki tövsiyələrini verməklə və müxtəlif ləvazimatları ianə etməklə dəstək göstərib.

İki həftə əvvəl Azərbaycan Dövlət Komissiyası ekspertizalar nəticəsində erməni işğalından azad edilmiş ərazilərdə kütləvi məzarlıqlarda qalıqları aşkar edilmiş 15 nəfərin şəxsiyyətinin müəyyən edildiyini bildirib. Bu şəxslərin meyitləri qohumlarına təhvil verilib və onlar tərəfindən dəfn olunub. 06B