97 gündür  aclıq edən Fazil Qasımova təcridxanada təzyiq edirlər

İqtisadçı, İstanbul Universitetinin doktorantı Fazil Qasımov  97 gündür ki, Penitensiar Xidmətin müalicə müəssisəsində aclıq edir. Sentyabrın 17-də Beynəlxalq Qırmızı Xaç Komitəsinin Bakı nümayəndəliyinin əməkdaşları ona baş çəkiblər.

Vəkilin sözlərinə görə, Penitensiar Xidmət aclığı dayandırması üçün Fazil Qasımova təzyiq göstərir.

 “Penitensiar Xidmətin əməkdaşları Fazil Qasımova fiziki, mənəvi və psixoloji təzyiqlər edir. Onun yanında yemək yeyirlər, bərkdən danışırlar, kobud rəftar edirlər. Fazili psixoloji təzyiq məqsədi ilə müalicə müəssisəsinin çox ağır xəstələrin saxlanıldığı intensiv terapiya şöbəsinə yerləşdiriblər”, - vəkil qeyd edib.  

Fazil Qasımovun səhhəti çox ağır olaraq qalır.  “O, sərbəst hərəkət edə bilmir. Kifayət qədər çəki itirib”, - Rəhimli qeyd edib və deyib ki, uzun müddət onu müttəhimin yanına buraxmayıblar.

“Müalicə Müəssisəsinin əməkdaşları axtarış səbəbilə məni 50 dəqiqəyə yaxın yubatdılar. Mən dedim ki, buna imkan verməyəcəyəm. Bundan sonra məni qurumun rəis müavininin kabinetinə apardılar və o dedi: "Bura strateji obyektdir, bəlkə qanunsuz əşyalar gətirmisiniz, haradan bilirik?! Mən vəkil kartımı geri tələb etdim və şikayət edəcəyimi binanı tərk etmək istədim. Bundan sonra mənə yoxlama aparılmadan Fazil ilə görüşə icazə verildi", - Rəhimli bildirib.

Öz vövbəsində Penitensiar Xidməti bildirib ki, penitensiar müəssisələrə daxil olan şəxslər, o cümlədən vəkillər cəzaların icrası qanunvericiliyinin tələblərinə əsasən müvafiq yoxlama və baxış tədbirlərinə cəlb edilirlər.

“Sentyabrın 17-də vəkil Rövşanə Rəhimlinin qeyd edilən prosedura cəlb edilməklə Müalicə müəssisəsinə daxil olması təmin edilmişdir.

 Əlavə olaraq bildiririk ki, həbs edilmiş şəxs Fazil Qasımov İntensiv Terapiya şöbəsində saxlanılmır, habelə məhkum və işçi heyətinin qida qəbul etdikləri məkanlar fərqli olduğundan müraciətdə qeyd edilən digər xüsusatlar həqiqəti əks etdirmir.

Fazil Qasımova qarşı məhkum və həbs edilmiş şəxslər, eləcə də əməkdaşlar tərəfindən qanunsuz hərəkətlərə yol verilməmişdir, onun hüquqları təmin edilir və qanuni mənafeləri qorunur”, Penitensiar Xidmət qeyd edir.

* Bakı 1 saylı İstintaq Təcridxanasının sanitar-tibb şöbəsində saxlanılan Fazil Qasımov aclıq səbəbindən səhhətinin kəskin pisləşməsi ilə əlaqədar iyulun 26-da Penitensiar Xidmətin sanatoriyasına köçürülüb.

O 8 avqust 2023-cü ildə İstanbulda həbs olunaraq Azərbaycana gətirilib. O, tanınmış iqtisadçısı və Azərbaycan hökumətinin tənqidçisi Qubad İbadoğlu ilə birlikdə saxta pul hazırlamaqda ittiham olunub.

Hazırda Fazil Qasımovun cinayət işinə Qubad İbadoğlunun cinayət işindən ayrı baxılır. Sentyabrın 19-da Bakı Ağır Cinayətlər Məhkəməsində növbəti iclas keçiriləcək.