ABŞ Azərbaycana "yaşıl enerji" ilə bağlı dəstək verməyə hazırdır

Bakı/04.03.23/Turan: ABŞ Azərbaycana "yaşıl enerji" ilə bağlı dəstək verməyə hazırdır. Bu barədə ABŞ-ın Ticarət katibinin qlobal bazarlar üzrə köməkçisi və ABŞ və xarici Ticarət Xidmətləri üzrə baş direktoru Arun Venkataraman media üçün brifinqdə bildirib.

Onun sözlərinə görə, dekarbonizasiya prosesini təmin etmək üçün bir sıra texnologiyalar lazımdır. 

Arun Venkataraman qeyd edib ki, özəl sektor bu işdə yardım edə bilər.

"ABŞ dekarbonizasiya və "yaşıl enerji"yə keçidlə bağlı texnologiyaları Azərbaycanla bölüşmək istəyən ABŞ şirkətlərinin təşəbbüslərini dəstəkləməyə hazırdır", deyə o bildirib.

Ticarət katibinin köməkçisi Azərbaycan və ABŞ arasında bərpa olunan enerji mənbələri sahəsində əməkdaşlığın genişləndirilməsinin vacibliyini qeyd edib.

"Təbii qaz hələ də vacib rola malik olsa da, bərpa olunan enerji mənbələrinin inkişafı heç də az əhəmiyyət kəsb etmir", deyə o vurğulayıb.

Onun fikrinə görə, ABŞ şirkətləri Azərbaycanın "yaşıl" enerji ilə bağlı uğurunda, xüsusilə də külək və günəş enerjisində iştirakçı olmağa maraqlıdır.

Venkataraman həmçinin ABŞ-ın Orta Dəhlizin inkişafını dəstəklədiyini də vurğulayıb.

Onun sözlərinə görə, bu dəhlizin inkişafı ticarət əməkdaşlığının genişləndirilməsinə, iştirakçı ölkələrdə insanların həyat səviyyəsinin yaxşılaşdırılmasına kömək edəcək.

"Biz Azərbaycanı və region boyu ölkələri müxtəlif layihələrdə və proqramlarda dəstəkləyirik, həmçinin, ABŞ-ın özəl sektorunun logistika, nəqliyyat, rəqəmsallaşma sahəsində təcrübəsinin gətirilməsinin də Orta Dəhlizin uğurlu olmasına imkan verəcəyinə inanırıq", deyə o qeyd edib.

Arun Venkataraman aprelin 5-dək Azərbaycanda səfərdədir.

O, aprelin 3-də Bakıda Azərbaycanın energetika rəsmiləri ilə birgə ABŞ-Azərbaycan Yaşıl Enerji Forumunun işində iştirak edib.

Arun Venkataraman həmçinin Türkiyə, Ermənistan və Gürcüstana səfər edəcək. 16D