ABŞ Azərbaycandan əməkdaşlığın ardıcıl inkişafını gözləyir

Bakı/14.09.17/Turan: ABŞ bu gün Bakıda Xəzərin Azərbaycan sektorunda "Azəri-Çıraq-Günəşli" yataqlarının 2050-ci ilə qədər PSA tipli saziş imzalanmasını alqışlayır.

"Bu, Azərbaycan və onun, Birləşmiş Ştatlar daxil olmaqla, dənizdəki AÇG neft yataqlarını inkişaf etdirən tərəfdaşları üçün möhtəşəm bir gündür", deyə ABŞ-ın Bakıdakı səfirliyinin yaydığı rəsmi məlumatda bildirilir.

Press-relizdə xatırladılır ki, Birləşmiş Ştatlar neft və qaz ehtiyatlarının iqtisadi çiçəklənmə və dünya enerji təhlükəsizliyinin artırılması məqsədilə əsas faktor qismində inkişafını və onların Avropa və digər bazarlara təhlükəsiz tədarükünü müşahidə edərək, neft və qaz ehtiyatlarının Azərbaycanda və Xəzər dənizi hövzəsində inkişafını 1990-cı illərin əvvəlindən başlayaraq aktiv şəkildə dəstəkləyir.

Bu dəstək Prezident Trampın 24-cü Beynəlxalq Xəzər Neft və Qaz Sərgisi və Konfransının keçirilməsi münasibətilə ən xoş arzularını ifadə etdiyi 28 may tarixində yazdığı məktubda və Dövlət Katibi Tillersonun fevral ayında keçirdiyi Müşavirə Şurasında Birləşmiş Ştatların Cənub Qaz Dəhlizini dəstəkləməsi haqqında səsləndirdiyi bəyanatında da nümayiş etdirilir.

Amerikanın neft şirkətləri Azərbaycan Beynəlxalq Əməliyyat Şirkəti konsorsiumunda əzəli iştirakçılar sırasında qalmaqdadır və 1990-cı illərin sonlarında Birləşmiş Ştatlar AÇG və Xəzər dənizi hövzəsindəki digər regionlardan dünya bazarlarına neft daşıyan Bakı-Tiflis-Ceyhan (BTC) boru kəmərinə güclü siyasi və maddi dəstək verib.

Amerikanın neft-mədən avadanlıqları və xidmət şirkətləri həmçinin bu layihələrin həyata keçirilməsində əsas rol oynayıb. BTC boru kəmərindən sonra əməkdaşlıq hazırda Xəzər qazını Gürcüstan və Türkiyəyə çatdıran Cənubi Qafqaz Boru kəmərinin tikintisinə gətirib çıxarıb. Yaxınlarda Birləşmiş Ştatlar qaz təchizatını Avropa istehlakçılarına çatdırmaq üçün yeni mənbə və marşrut yaratmaqla Avropa enerji təhlükəsizliyini gücləndirən Cənub Qaz Dəhlizinin inkişafında Azərbaycan, Gürcüstan, Türkiyə və digər ölkələrlə yaxından əməkdaşlıq edib.

Bütün bu layihələr nəinki Xəzər dənizi ehtiyatlarını dünya üçün açmış, həm də Azərbaycanın iqtisadi artımına təkan verib.

ABŞ Azərbaycanın ümumi inkişafında, onun qeyri-neft sektorlarının artmasında və yeni İpək Yolunun reallaşdırılmasında çoxdankı tərəfdaşı olduğu üçün uzun müddətdir ki, neft və qaz sektorunda baş verən iri həcmli strateji layihələrdə Azətbaycanın tərəfdaşı olub və tərəfdaşı olaraq qalmaqdadır.

Press-relizin sonunda prezident Trampın bu ilin əvvəlində söylədiyi sözlər qeyd edilir: Mən Birləşmiş Ştatlarla Azərbaycanın son 25 ildə birlikdə qurduğu əməkdaşlığı dəyərləndirirəm və bu əməkdaşlığın davamlı inkişafını gözləyirəm". -06D-