ABŞ bildirir ki, Rusiya artıq Əsədin cinayətlərinə "qarışıb"

Bazar ertəsi ABŞ bildirib ki, 13 illik vətəndaş müharibəsindən və bu ailənin 50 il hakimiyyətdə qalmasından sonra devrilmiş diktator Bəşər Əsəd Moskvaya qaçdığı üçün Rusiya Suriya xalqına "cavab verməlidir".

"Rusiya yüzlərlə təqsirsiz suriyalını öldürən, öz xalqını qazla zəhərləyən amansız rejimi dəstəkləyirdi. Rusiya qoşunlarının dinc Suriya sakinlərini necə bombaladığını görürdünüz. İndi Rusiya bu hücumlara görə məsul olan qəddar tirana sığınacaq verir", deyə Dövlət Departamentinin nümayəndəsi Metyu Miller brifinqdə bildirib.

Ruslar "Əsədi dəstəklədiklərinə görə Suriya xalqı qarşısında mütləq cavab verməli olacaq və Suriya ərazisindəki Rusiya hərbi bazalarından söhbət açıldıqda suriyalılar bu sualları versə, qəti şəkildə təəccüblənməyəcəyəm".

Rusiya diktatoru beynəlxalq ədalət sisteminə təslim etməkdən imtina etsə, Əsədin hərbi cinayətlərinin iştirakçısı hesab olunacaq? Turan-ın bu sualına Miller belə cavab verib: "Düşünürəm ki, Rusiya artıq Əsədin Suriya xalqına qarşı cinayətlərinin iştirakçısıdır. Onun iştirakını sübut etmək üçün başqa nəyəsə ehtiyac olduğunu düşünmürəm".