ABŞ Gürcüstan hökumətinin demokratiyadan uzaqlaşmasına cavab olaraq yardımı dayandırır

Çərşənbə günü Bayden administrasiyası Gürcüstanda demokratik institutların davam edən eroziyasına cavab olaraq ölkə hökumətinə xarici yardımın əhəmiyyətli bir hissəsini dayandırıb, Turan-ın Vaşinqton müxbiri bildirib.

Gürcüstan hökuməti yeni qəbul edilmiş "xarici agentlər" haqqında qanunu həyata keçirməyə hazırdır. Moskvadan idxal edilən qanun vətəndaş cəmiyyəti təşkilatlarını maliyyələrinin 20 faizdən çoxunu xaricdən aldıqları təqdirdə xarici agent kimi qeydiyyatdan keçməyə məcbur edir. 

Çərşənbə günü səhər dövlət katibi Entoni Blinken öz bəyanatında bildirib ki, Gürcüstanın antidemokratik hərəkətləri və yalan bəyanatları "Avropa İttifaqı və NATO-ya üzvlük normaları ilə bir araya sığmır" və nəticədə ABŞ Gürcüstan hökumətinə 95 milyon dollar məbləğində yardımı dayandıracaq.

"Demokratiyanın, qanunun aliliyinin, müstəqil KİV və iqtisadi inkişafın möhkəmləndirilməsi yoluyla Gürcüstan xalqına fayda gətirən proqram və tədbirlərə" yardım davam etdiriləcək.

“Ölkələrimiz və vətəndaşlarımız arasındakı 32 illik dostluq və tərəfdaşlıq dövründə ABŞ xalqı Gürcüstanın iqtisadiyyatının və demokratik institutlarının inkişafına və möhkəmlənməsinə töhfə verən 6,2 milyard dollardan çox yardım təqdim edib", - Blinken deyib.

"Bizim dəstəyimiz Gürcüstanın müdafiə qüvvələrini və Sahil mühafizəsini təchiz etməyə və öyrətməyə, məktəblər və xəstəxanalar tikməyə, müəllimlər, dövlət qulluqçuları və tibb işçiləri yetişdirməyə kömək etdi. Biz Gürcüstan xalqına və onun Avroatlantika səylərinə sadiq qalacağıq", -  o əlavə edib.

"Lazım gələrsə, istənilən əlavə və müvafiq tədbirləri görməyə hazırıq", - brifinq zamanı mətbuat katibinin müavini Vedant Patel Turan-ın sualını cavablandırarkən bildirib.

O xatırladıb ki, gürcü xalqının 80 faizə qədəri  Avropa İttifaqına üzvlüyü dəstəkləyir, baxmayaraq ki, Gürcü Arzusu hökuməti  "öz hərəkətlərilə ölkəni öz vətəndaşlarının Avropa istəklərindən uzaqlaşdırır".

"İkitərəfli əlaqələrimiz unikal mürəkkəb anda olsa da, Birləşmiş Ştatların gürcü xalqına və onun istəklərinə sadiqliyi tamamilə dəyişməzdir. Biz demokratiyanı, qanunun aliliyini, müstəqil KİV və iqtisadi inkişafı möhkəmləndirməklə Gürcüstan xalqına fayda gətirəcək proqramları və tədbirləri dəstəkləməyə davam edəcəyik".

Helsinki Komissiyası liderlərinin Blinkenə ünvanladıqları, Bidzina İvanişviliyə və onun yaxın çevrəsinə qarşı sanksiyalara çağıran son məktubu ilə bağlı Turan-ın sualının cavabında  Patel deyib ki, hazırda Vaşinqtonun gələcək hərəkətlərini proqnozlaşdırmayacaq.