ABŞ Konqresində Gürcüstan və Moldovada vəziyyətlə bağlı dinləmələr keçiriləcək

Bayden administrasiyasının aparıcı üzvləri gələn həftə Konqresin Xarici İşlər Komitəsi qarşısında oktyabrda keçiriləcək seçkilər ərəfəsində hər iki ölkədə ABŞ-ın siyasəti barədə ifadə verəcəklər, Turan-ın Vaşinqtondakı  müxbiri bildirib.

Dövlət Departamentinin Avrasiya məsələləri üzrə katibinin köməkçilərinin müavinləri Cuşua Hak və Kristofer Smit, həmşinin USAID-in Avropa və Avrasiya üzrə administratorunun köməkçisinin müavini Aleksandr Sokolovski 23 iyul çərşənbə axşamı Avropa Alt Komitəsinin açıq dinləmələrində ifadə verməlidirlər.

ABŞ bu yaxınlarda "Xarici agentlər haqqında qanun" qəbul edildikdən sonra Gürcüstanla münasibətlərinə hərtərəfli icmala başlayıb. Belə ki, bu qanun Gürcüstan vətəndaş cəmiyyəti qruplarını maliyyələşmənin 20 faizdən çoxunu xaricdən aldıqları təqdirdə xarici agent kimi qeydiyyatdan keçməyə məcbur edir.

Qanun bu yay qüvvəyə minəcək və oktyabrın 26-da ölkədə keçiriləcək parlament seçkiləri ərəfəsində vətəndaş cəmiyyətinə zərbə vuracaq.

Dövlət Departamentinin mətbuat katibi Metyu Miller Vaşinqton müxbirinə deyib ki, ABŞ Gürcüstan xalqının Avroatlantika səylərini "dəstəkləməyə davam edəcək", "lakin biz Gürcüstan hökumətinin başqa yolla getdiyini gördük".