Dövlət Departamenti Azərbaycanda investisiya mühiti haqqında hesabat hazırlayır

Birləşmiş Ştatlar Azərbaycanda investisiya mühiti haqqında hesabat hazırlayır. Biznes mühiti haqqında əsaslı qərarlar qəbul etmək üçün bu hesabat həm ABŞ-ın vəzifəli şəxsləri, həm də investorlar tərəfindən geniş istifadə olunur, Turan-ın Vaşinqtondakı müxbiri bildirib.

Bu həftənin əvvəlində Dövlət Departamenti 2024-cü ildə 165-dən çox ölkə və iqtisadiyyat üçün investisiya mühiti haqqında öz açıqlamalarını dərc edib, lakin orada Azərbaycan olmayıb.

"Azərbaycan üzrə hesabatın dərci texniki səbəblərdən təxirə salınıb", - cümə günü Dövlət Departamentinin mətbuat katibi Turan-ın sorğusuna cavab olaraq bildirib və sənədin yaxın vaxtlarda dərc olunacağını vəd edib.

Belə hesabat orta sinfin iqtisadi baxımdan əsaslandırılmış inkişaf şərtləri, işçilərin hüquq və imkanları, beynəlxalq səviyyədə tanınmış əmək hüquqlarının mövcudluğu, korrupsiyaya qarşı mübarizə, məsuliyyətli biznesin aparılmasının dəstəklənməsi və iqlim böhranının aradan qaldırılması haqqında təsəvvür əldə etməyə imkan verən resursdur.

Məsələn, bu il Ermənistan və Gürcüstanla bağlı məruzələr xarici investisiyaların açıqlığı və məhdudlaşdırılması, hüquqi və normativ sistemlər, real və əqli mülkiyyət hüquqlarının qorunması, maliyyə sektoru, məsuliyyətli işgüzar davranış, korrupsiya və digər mövzuları əhatə edir. Müəlliflərin sözlərinə görə, Ermənistan investorlar üçün müxtəlif imkanlar açır, hüquqi baza və ölkə hökumətinin siyasəti isə investisiyaların cəlb edilməsinə yönəlib. Buna baxmayaraq, investisiya mühiti problemsiz deyil. "Maneələr Ermənistan bazarının kiçik ölçüsünü, Türkiyə və Azərbaycanla sərhədlərin bağlı olması səbəbindən nisbi coğrafi təcridi, hüququn aliliyi və məhkəmə orqanlarında zəif cəhətləri, həmçinin korrupsiya irsini əhatə edir",-hesabatda deyilir.

Gürcüstana gəlincə, hesabatda ümumilikdə işgüzar mühit müsbət qiymətləndirilsə də,  Gürcüstanın məhkəmə sisteminin müstəqilliyilə bağlı narahatlıq ifadə olunur.

İşgüzar mübahisələr tez-tez məhkəmələrdə ilişib qalır, effektiv antiinhisar qanunvericiliyi yoxdur.

Bundan əlavə, Gürcüstanda inteqrasiya olunmuş kommersiya kodu yoxdur.

ABŞ-ın Gürcüstanla ikitərəfli əməkdaşlığa yenidən baxılması barədə son qərarı ilə bağlı  Turan-ın sualının cavabında  Dövlət Departamentinin mətbuat katibi deyib: "Biz Gürcüstanda demokratiya ilə bağlı hadisələri, o cümlədən bu məsələlərin investisiya mühitinə necə təsir edə biləcəyini izləməyə davam edirik".

2024-cü ildə investisiya mühiti haqqında hesabatı buradan oxumaq olar: https://www.state.gov/reports/2024-investment-climate-statements/